Shillong, Risaw 22
Ka Seng Samla Catholic, Holy Cross Parish, Mawkynrew ha ryngkat ka jingïasnohktilang bad ka tnad Lariti bad kam jngoh kai pyrthei nalor kiwei-kiwei ha ka Sngi Saitjaiñ ka la pynlong ïa ka tamasa ‘Sohphlang’ ha Holy Cross Higher Secondary School, Mawkynrew.
Kane ka thaiñ ka bna nam na bynta ka jingjyrngam, ki lum bad ka jingitynnad mariang, ha kawei ka liang, kaba biang eh na bynta ban pynlong ïa kane ka tamasa.
Ïa u Sohphlang la ju bna na bynta ka jinglong dawai jong u khamtam haba shna ïa ki dawai kynbat. Ki nongsumar bad nongai dawai tynrai ki pyndonkam ïa ki bynta bapher-bapher jong u Sohphlang na bynta ki jingsumar ba bun rukom.
Kine ki rukom sumar tynrai ki la hiar pateng la pateng bad ki ïai bteng ban long ki tyllong jingshaniah ha ka liang ka koit ka khiah na bynta kiba bun hapoh ka imlang-sahlang.
Ha kajuh ka por, ka jinglong kongsan ha ka liang ka lariti ka la ngam jylliew ha ki riti-dustur jong kito kiba shong ba sah ha Mawkynrew. Naduh ki kam ba ïadei bad ka jinglehniam haduh ki dawai dashin, u Sohphlang u don ka jingïadei ba ïajan bad ka jingim ba man ka sngi jong kane ka thaiñ, ha kawei ka liang kaba pyni ruh ïa ka jingim suk im saiñ hapdeng ka mariang bad ki nongshong shnong ka Jylla.
Katkum ka jingïathuh ki nongpynïaid, ka tamasa ka pynbiang ïa ka lad ka kabu kaba kyrpang na bynta ka imlang-sahlang ban ïawan lang bad rakhe ïa ka tamasa Sohphlang, da kaba pdiang ruh ïa ka jingïadei jong u bad ki jingthaw ba don jingim lem bad ki sawdong sawkun jong ki, lariti bad ka jinglong kongsan jong u ha ka liang ka dawai-dashin.
Nalor kane, ka tamasa Sohphlang ka long kum ka rynsan pyninam ïa ka jingriewspah jong ka lariti ka thaiñ.
“Ka tamasa Sohphlang mynta u snem ka dei ka jingrakhe ïa ka mariang bad ka lariti, kaba pynkynmaw ïa ngi ïa ka jingbym lah long la ka jong hapdeng ki nongshong shnong bad ka mariang,” la ong ki nongpynïaid.
Haba ai jingkren ha ka jingïalang, u MLA ka Mawkynrew, Bah Banteidor Lyngdoh u la pynpaw ka jingsngewkmen ba ha ryngkat ka jingïadon bynta lang, la lah ban pynlong ïa kane ka tamasa kaba jop bad bynrap ba yn pynlong noh ïa ka man u snem.
Da kaba pynpaw ba ka konstitwensi jong u ka dei kaba la kyrkhu da ka mei mariang, u la ong ba ki jaka jngohkai kiba don ha Mawkynrew ki la kylla long ki jaka kiba ki nongwan jngohkai ki wad bha mynta ki por.
“Ngi don ïa ka Nongjrong, Laitlum, Nohron, Syntung bad kiwei-kiwei ki jaka baitynnad kiba la ïoh jingïaroh na kiba bun hynrei dang hap pynbit-pynbiang shuh shuh ïa ki,” u la ong.
Shuh shuh u la bynrap, “Ngi kwah ba ka kam jngohkai kan dei ka bynta ka ban ai jingkyrshan ïa ki nongshong shnong ha ka ïoh ka kot.”
