Shillong, Risaw 22
U President ka Sengbah Nongshat Nongkheiñ Hynñiewskum Hynñiewtrep, Bah Pran Jala, u la pyntip ba ka sengbah ka dang donkam ban hikai ïa ki longkmie ba kin kha shibun ki khun khnang ban roi ka jaidbynriew.
“Kum ki riewtymmen ngi ïohi ba kan don jingma ïa ka jaidbynriew namar haba ki longkmie ki leit sha hospital ki shu shah pan puid beit haba ki leit kha khyllung namar lada shah puid tang lai ngut khun la hap ban pynwai noh” u la ong.
U Bah Pran u la ong lada shu puid lada jia ba ka kmie ka kha tang shynrang ka mut ka jait ka la duh ha ka riti dustur Khasi. Nangta don ki longkmie haba kha tang kynthei kim ïoh khun shynrang shuh, hynrei lada kha bun ngut kin ïoh lang bad kynthei bad shynrang.
U la pynkynmaw ba ha ki por mynshwa ha bym pat don hospital bym pat don doktor, ki longkmie ki kha hi bad ki shait ki khlaiñ, hynrei mynta tang shu poi ha hospital la shu pan puid beit.
Kumta u la ong ba ka sengbah ka donkam bha ban hikai ïa ki longkmie ba kin sumar bha ïalade ban kha bun khun namar kat dang kha bun khun katta dang bha ka kamai kajih.
Nalor kane, u la ïathuh ruh ba ki la don palat hajar ngut ki longkmie kiba u la ïoh ban leit pynkha khyllung haba ki kha ha ïing, hynrei kim ju lei-lei.
U la ong ba lada kha bun khun ka ïing ka sem ka roi lada ïoh ïa ki khun kiba tipsngi, hynrei lada ïoh ïa ki khun shukor ka ïing kan shu lyngkrang.
Nalor kata, u la ïathuh ha ka jinglap ka jong u, ki don ki longïing kiba kha haduh 15 ngut ki khun, hynrei ki roi ki bit ki biang ban ïa kito ki longïing kiba don tang 2 ne 3 ngut ki khun.
Shuh shuh u la ong ba ha sor ki longkmie kim nud shuh ban kha bun khun namar da shong wai ki trai ïing kim aiwai ïing shuh namar ki tieng ïoh dap paiñkhana, hynrei ha nongkyndong da kha bun dang long namar ka jaka ruh dang pahuh.
Haba ïadei bad ki khyllung, u la kyntu ïa ki longkmie ba ym dei ban ai than da ki dawai haba mih ki khñiang, hynrei ki dei ban sumar da kaba pynduwai.
