Shillong, Risaw 22
Ki nongthep ‘vote’ kiba shong ba sah ha Jhalupara kaba hap ha Cantonment ba peit da ki shipai ki don palat 4351 ngut tam ne duna tang ki nongthep ‘vote’ ha ka ilekshon MLA kaba dang shu dep mynta u snem.
Ka Jhalupara ka dei ka shnong kaba hap ha South Shillong konstitwensi kaba don ha ka surok bah Shillong-Guwahati kaba don markhap bad ka shnong Mawbah kaba hap ha West Shillong konstitwensi.
Watla kiwei ki jaidbynriew ki don palat 4351 ngut ki nongthep, hynrei ki Khasi ki don kumba ar ïing kiba sah ha katei ka shnong kaba hap hapoh ka jingpeit ki shipai.
Ha Jhalupara ki don hynñiew tylli ki Polling Station kiba dei jong kynthei bad shynrang. Kumta lada kheiñ kyllum lang ïa ka jingdon briew bad ki khynnah khyllung kan poi beit palat 8000 ngut.
Ha kine ki sngi haba pyrshang ban ïakren bad u Rangbah Shnong Mawbah, Bah Arestone Thabah, ka shnong kaba don markhap bad ka Jhalupara u la ong ba lada ki Khasi ki don tang ar ïing ki dei beit ki Khasi ban bat kum Rangbah Shnong ha Jhalupara. Namar lada ïa ka bor synshar yn bat da kiwei ki jaidbynriew kim salia ban ai syrnod lada wan ki briew kiba nabar ka jylla namar kim sngewthuh ïa ka jingma jong ka jaidbynriew.
Shuh shuh u la pyntip ba ka shnong Jhalupara ka dei kaba hap ha Cantonment kaba dei ka jaka jong ki shipai kaba hap ruh ha ka South Shillong konstitwensi, hynrei ka buh jingma ruh ïa ki shnong ba marjan kum ka Mawbah, Nongsohphoh namar ki jingsniew ki mih bun bha na katei ka shnong.
U la kyntu ïa ka bor sorkar ba lada kim ithuh ïa ka kot ba ai ki Rangbah Shnong kiba shu kam ha Jhalupara kim nud ban ai syrnod ïa kiwei ki bar jylla.
Ha kajuh ka por u la kyntu ïa ki para Khasi lada ki don tang ar ïing ha Jhalupara ki dei ban mih shakhmat ban bat ma ki ïa ki kam Rangbah Shnong khnang ban shngaiñ ka jaidbynriew.
