New Delhi, Risaw 22 (UNI)
Ka India ha ka Sngi U Blei ka la phah ïa ki lad jingïarap sha Gaza Strip wat hapdeng ka jingïai bteng ka thma kaba shyrkhei jong ka Israel bad ka kynhun pyntriem Hamas.
“Ka liengsuiñ jong ka Indian Air Force kaba la kit kumba 6.5 ton ki dawai dashin bad 32 ton kiwei pat ki lad jingïarap na ka bynta ki paidbah Palestine ka la mih na ka Ri ban leit sha Egypt,” la ong u nongaiktien ka tnat bar ri, u Arindam Bagchi.
Ïa kine ki lad jingïarap yn phah sha Palestine lyngba ka jaka khappud jong ka Egypt bad Gaza kaba don ha Rafah.
“Ki lad jingïarap ki kynthup ïa ki dawai dashin, ki tiar ai jingsumar, ïing dara, dawai pynkhuid ïa ka um, plastik ban ïoh ker ban shong ban sah ki briew, bad kiwei,” la ong u Bagchi.
Ka jingphah jong ka India ïa ki lad jingïarap sha Palestine ka long lai sngi hadien ba u Myntri Rangbahduh, u Narendra Modi, u la ïakren bad u President ka Palestinian Authority, u Mahmoud Abbas.
Ha kane ka jingïakren, u Modi u la ong ba ka India kan bteng ban phah ïa ki lad jingïarap na ka bynta ki paidbah Palestine. U la pynpaw ruh ïa ka jingsngewlem halor ka jingkhlad noh jong kiba bun ngut ki ‘riew paidbah ha Gaza Strip hadien ba kawei ka Hospital ka la shah ther bom.
“Nga la pynpaw ïa ka jingsngewkhia halor ki kam pyntriem, jingthombor bad ka jinghiar ka jingshngaiñ ha ka thaiñ. Nga la pynpaw ruh ïa ka nongrim jong ka India halor ka jingïakynad hapdeng ka Israel-Palestine,” la ong u Modi hadien ka jingïakren bad u Abbas.
Kane ka thma kaba la sdang naduh ka 7 tarik Risaw ka dang ïai bteng bad da ki hajar ngut ki briew ki la ïap ha Gaza Strip bad kumjuh ruh ha Israel.
Ha ka Sngi U Blei, ki shipai Israel ki la kam ba ki la pynïap ïa ki ‘riew pyntriem jong ka Hamas bad Islamic Jihad ha ka jingther bom ïa kawei ka Mosque kaba don ha Jenin, West Bank.
Haduh mynta, ki la don palat 4,600 ngut ki paidbah ha Gaza Strip kiba la ïap na ka jingshah ther bom ha ka Israel katba ki la don kumba 1,400 ngut kiba la duh noh ïa la ka jingim ha Israel na ka jingthombor ka Hamas.
