Khliehriat, Risaw 22
Ka Jaiñtia National Council (JNC) ka la phah jingthoh sha ka Sorkar MDA 2.0 bad khamtam sha ki 7 ngut ki MLA napoh Jaiñtia Hills ba ka seng hi ka ïeng halor ka nongrim kaba skhem ban pyrshah ïa ka jingthmu jong ka Sorkar Jylla ban wanrah ïa ka lynti rel hapoh East Jaiñtia Hills District, bad lyngba kane ka kyrwoh ka seng ka kwah ban pynshai halor katto-katne tylli ki mat kiba pynlong ïa ka JNC bad pyrshah jur ïa kane ka jingthmu jong ka Sorkar Jylla.
Ka seng ka la ong ruh ba ka JHADC kam pat lah ban shna ïa ki aiñ kiba khlaiñ ban ïada ïa ka khaïi ka pateng jong ki trai-ri trai- muluk & bad ki Dorbar Shnong kim don kata ka jingpynkup bor lyngba ka Jylla lane ki ADC ban pyrkhing bad tehlakam ïa ka jingwan rung jong ki mynder ri, bad kam don kata ka jingpyrkhing ïa ki Waheh Shnong bad ki Daloi ban ai ïa ki NOC sha ki bar Jylla ban seng kam seng jam hapoh ka shnong ka thaw, bad lada wan ka lynti rel bun ki bar jylla ki ban sa wan seng kam hapoh ka East Jaiñtia Hills District.
“Kumta ngi kum ki Sixth Schedule Area ngi donhok ban pyrshah ïa kane ka jingma kaba ap ïa ka khaïi ka pateng ki trai-ri trai-muluk, tang mynta bym pat don rel ruh ngi la ïakynduh shibun ki jingeh lyngba ka jingwan tyllep jong ki bar Jylla bad knieh ïa ka kamai kajih jong ki trai-ri trai-muluk,” ong ka seng.
Ka jingwan jong kane ka lynti rel kan sa ktah ruh ïa ki shnong ki thaw, ki khlaw ki btap, ki lum ki wah, ki jaka rep, jaka riang bad kumjuh kan sa pynjakhlia ïa ki shnong ki thaw.
Ka EJHD ka dei kawei na ki disktrik kaba bun bha ki karkhana bad ka jingwan jong ka rel kan pynmyntoi tang ïa kine ki karkhana kiba don hapoh ka distrik bad kan pynsuk ïa ki ban shalan ïa ki mar jong ki sha kiwei pat ki Jylla bad kan sa ktah pat ïa ki trai trok kiba dei ki trai-ri trai-muluk.
“Kaba kham ma ka long ba ynda lah don ka lynti rel la ka dei makna ka rel kit-mar ruh, ngi tip shai ba kan sa pynsuk ïa ki briew kiba na bar Jylla ban wan buhai shnong shapoh kane ka distrik bad kane ka jingwan buhai shnong jong ki briew kiba nabar kan sa ktah ruh ïa ka ïoh ka kot jong ki trai-ri trai-muluk bad kan sa wanrah ruh ïa ka jingshongkha khleh kaba shyrkhei sha ki thaiñ nongkyndong bad ngi lah ruh ban kylla long ki rit paid ha Ri lajong namarba haduh mynta ruh ngim pat don ki aiñ kiba khlaiñ bor kum ka ILP ban ïada ïa ngi na ka jingwan tyllep jong ki briew kiba na bar jylla,” la ong ka kyrwoh.
Shuh shuh ka JNC ka kyntu ïa ki Myntri jong ka Sorkar Jylla kiba napoh Jaiñtia Hills ban kren lem hapoh ka jingïalang Kynhun Myntri ka MDA 2.0 ha kaba ïadei bad ka jingsahdien jong ka East Jaiñtia Hills District ha ka liang ka surok, ki Hospital Sorkar, ka kolej Sorkar bad kiwei-kiwei bad kim dei ban kren tang na bynta ban wanrah jaka rel hapoh EJHD namar ïa mynta hi ka distrik kam pat donkam ïa kata ka rel.
Ka seng ka long kaba la khreh ban ïaid noh da kiwei pat ki lynti lada ka Sorkar kam sangeh noh mardor ïa kane jingthmu ban wanrah ïa ka rel hapoh EJHD.
