Tel Aviv, Risaw 22 (UNI)
Ka jingdon jong ki briew kiba la shah rahbor ha ka Hamas sha Gaza Strip ka la kiew sha ka 212 ngut watla ki la don ki jingpyrshang na kiba bun tylli ki Ri ban pynthikna ba ka Hamas kan pyllait ïa kiba la shah rahbor katba ka Israel kan pyllait ïa ki briew kiba la shah kem, la ong u nongaiktien ka tnat Israel Defense Forces (IDF), u Daniel Hagari, ha ka Sngi U Blei.
Ha ka Sngi Saitjaiñ, la pynthikna ba ki la don 210 ngut ki briew kiba dang don hapoh ka jingpeit ka Hamas hadien ba ki la shah rahbor. Kane ka long hadien ba la pyllait ïa ki arngut ki nongshong shnong ka America ar sngi mynshwa.
“Haduh mynta, ngi la dep ban pyntip sha ki longïing longsem jong ki 212 ngut kiba la shah rahbor bad jong ki 307 ngut ki shipai ka IDF kiba la khlad,” la ong u Hagari haba kren sha ki lad pathai khubor.
Nalorkata, ka IDF ka la ong ba la kem ïa 27 ngut ki dkhot ka Hamas na West Bank ha ka miet Sngi Saitjaiñ. Naduh ba sdang jong ka jingïakynad, ki la don 727 ngut ki nong Palestine, kynthup ïa 480 ngut kiba la kynnoh ba ki don jingïadei bad ka Hamas, kiba la shah kem ha ki shipai Israel.
Ha ka 7 tarik Risaw, ka kynhun pyntriem jong ka Hamas ka la leit hiar thma ïa ka Israel na ka thaiñ Gaza Strip bad ka la pynïap ïa kiba bun ngut ki nong Israel.
Kum ka jingpynhiar kput, ka Israel ka la ther da ki bom ïa ka Gaza Strip kaba don kumba 2 million ngut ki nongshong shnong. Nalorkata, ka Israel ka la pynduh ban pynpoi umbam, marbam bad umphniang. Dang ha kine ki sngi, la ailad ïa ki trok kiba kit ïa ki lad ai jingïarap sha Gaza ba kin ïaid kin ïeng.
