Shillong, Risaw 23
Ka Khasi Jaiñtia Christian Leaders Forum (KJCLF) ka pynshai ba ka kynhun kam don ka jingpyrshah ïa ka jingpynlong tamasa jong ka Sorkar Jylla, hynrei ka kwah ban pynskhem bad kren shai ba ka Sngi U Blei ka long ka sngi kaba khuid bad kyntang na ka bynta ki ‘riewngeit Khristan bad ki Balang.
“Ka Forum ka khmih lynti ba kine ki tamasa kin ïaid beit ïaid ryntih khlem don kano-kano ka jingpynwit bad jingpynthut khnang ba kane kan long ruh kaba kyntiew ïa ka jingshongsuk shong shngaiñ ha ka Jylla,” la ong u Secretary ka KJCLF, Rev. Dr. E.H. Kharkongor ha ka kyrwoh khubor.
Kham ha shuwa, u Myntri ka tnad Kam Jngohkai Pyrthei ka Jylla, u Bah Paul Lyngdoh u la ong ba ka Sorkar kam shym la pynbor satia ïano-ïano bad la ieh ha ka mon ba laitluid jong ki paidbah, bad ai kiba sngewtynnad kin leit bad ki bym sngewtynnad kin ym leit sha kata ka tamasa ‘Cherry Blossom’ ïa kaba yn pynkut ha ka Sngi U Blei.
U suba ruh ba ka jingmih jong ki jingpyrshah ka paw kumba ka don ka buit politik kaba don na sha lyndet bad ba ki don ki bor kiba pyrshang ban khang lad ïa ka jingkiew jong ka kam jngohkai.
Ha kawei pat ka liang, ka Joint Action Committee (JAC) kaba kynthup ïa ki kynhun Seng bapher bapher na Ri-Bhoi ka la rai ban ïeng tylli bad ban dawa na ka Sorkar ba ka dei ban pynkynriah noh ïa ka tarik pynkut jong ka tamasa ‘Cherry Blossom’, bad ym ban pynkut ne pynlong ha ka Sngi U Blei.
Katei ka JAC ka kynthup ïa ka Hynñiewtrep Youth Council (HYC), Meghalaya People United Front (MPUF), Ri-Bhoi Youth Organization (RBYO), United Hynñiewtrep Movement (UHM), Saiñdur Tipkur Tipkha Ehrngiew Hynñiewtrep (STIEH) bad ka Meghalaya People’s Social Organization (MPSO).
Na ka liang ki nongïalam ka JAC ki la maham ba lada ka Sorkar kam sngap bad kam pynkynriah bad ïaid beit ban pynkut ïa katei ka tamasa ha ka Sngi U Blei, kin ym ailad satia hynrei kin pynlong da ka jingïakhih.
