Cairo, Risaw 23 (UNI)
Ka jingïap briew na ka jingther bom ka Israel ïa ka Gaza Strip ka la kiew sha palat 5 hajar ngut ha ka Lah Sngi U Blei, la ong ka kynhun Hamas kaba pynïaid ïa ki Hospital ha Gaza Strip.
Haba ai ïa kane ka jingtip, u Ashraf Al-Qudra, uba dei u nongaiktien ka tnat ka koit ka khiah ka Hamas ha Gaza Strip, u la ong ba ka jingïap briew ka la kot sha ka 5,087 ngut.
Na kine kiba la ïap, ki don 2,055 ngut ki khynnah, 1,119 ngut ki kynthei bad 217 ngut ki tymmen ki kro.
Nalorkata, u la ïathuh ba ki don haduh 15,273 ngut ki nongshong shnong kiba la mynsaw naduh ba ka Israel ka la ther ïa ka Gaza Strip ha ka 7 tarik Risaw hadien ba ka Hamas ka la wan ban thombor ïa ka Israel bad pynïap ïa kiba bun ngut ki nongshong shnong.
Ha kawei pat ka liang, ka Hamas ka la pyntip ba baroh ki Hospital kiba don ha Gaza Strip ki la lut umphniang.
“Baroh ki Hospital kiba don ha Gaza Strip kim don umphniang shuh,” la ong ka Hamas ha ka jingai khubor da kaba bynrap ba ki lad jingïarap kiba la poi ha Gaza Strip ha ki ar sngi kim pat biang satia ban pyndap ïa ki jingdonkam jong ki nongshong shnong.
