Shillong, Risaw 23
Ka Seng Kynthei jong ka Seng Khasi Kmie, ka la pynlong ïa ka jingïalang ban pynkup burom ïa ki khun samla, kiba la lah ban pass bha shakhmat ha ki eksamin bapher-bapher kiba la pynlong mynta u snem.
Ïa kane ka jingïalang la pynlong ha Hall jong ka Seng Khasi Kmie, Mawkhar Shillong, ha kaba la don haduh 11 ngut ki samla kynthei bad shynrang ba la ïoh ïa kane ka khusnam mynta ka kynti.
Nalor ka jingpynkup burom ïa ki samla kiba pass bha, ka Seng Kynthei, ka la pynkup burom ruh ïa ki ar ngut ki longkmie kata, ïa ka Kong Sweetymon Rynjah bad kumjuh Kong Silbi Passah, halor ka nongrim u synñiang u bynhei uba ki la noh sha u sup u thiar jong ka thoh ka pule, ka rwai ka siaw, ka put ka tem, kiba long da shisha ka spah bah bakordor ym tang ïa kane ka pateng kaba mynta hynrei wat ïa ki longdien bad ki pateng ban dang ïai wan.
Ka Kongsan ba la wan ban donlang ka dei ka Kong Baiantimon Blah (MCS), ryngkat ka jingsakhi lang u Acting President bad General Secretary ka Seng Khasi Kmie, u Rgh O. Pyngrope bad Rgh Hainess Marbaniang, ki dkhot ka Jylli Pyrkhat Kam Seng Khasi Kmie, ki dkhot jong ka Seng Kynthei, ki kmie ki kpa jong ki khynnah ba la ïoh ïa ka khusnam bad kiwei kiwei.
Haba phai pat sha ka bynta ka jingpynkup burom ïa ka Kong Sweetymon Rynjah bad Kong Silbi Passah, ïa kane ka kam la pyndep da u Acting President u Rgh O. Pyngrope lem bad u Rgh P.D Nongrum, dkhot jong ka JPK.
U Acting President ka Seng Khasi Kmie u Rgh O. Pyngrope u dap da ka jingsngew kmen ban ïohi bad ïohsngew ba ki khun samla ka seng ki la ïai bteng ban kiew shakhmat, ha kaba u la pynpaw ba ka burom ka leit ruh sha ki kmie ki kpa ki bahaïing hasem kiba la lah ban ïalam bad btin lynti ïa la ki khun ki kti.
Haba phai pat sha ki khun samla, u Bah Pyngrope, u la ong ba ki khun samla kiba la ïoh kat kane ka burom bad na ka liang ka Seng Khasi Kmie ka kyntu ba kin da pynlut ruh ïa ka por ba kordor ka jong ki ba kin pule ïa ki kot kiba thoh shaphang la kajong, khnang ba lada ki leit ban pule shabar ba lada ki briew ki kwah ban tip shaphang ka seng, bad lada kum ki samla kim tip eiei, ka wanrah ïa ka jingsngew biej ïa baroh.
Ha kane ka juh hi ka jingïalang, ka Seng Pyni Committee ka Seng Khasi Kmie, ka la wan shakhmat ba kan sam ïa i song jingai sngewbha sha ki katto katne ki khun samla, ki longkmie kiba don baroh 12 ngut, kiba smat bad ban poi tista bha ha man la ka Seng Pyni kaba ju pynlong ha ïing Seng ha Mawkhar, Shillong man la ka Sngi Robibar. Kane ka jingai ïa i song ai sngewbha ka long ban kyrsiew thiah ruh lem ïa kiwei pat ki parakur ki parakha khamtam ïa ki khun samla, ba kin wan tista sha ka Seng Pyni kaba ju long ha ka nohphai sngi jong ka Sngi Robibar ka taïew, kaba hangne lah ban ïoh ban lum ban lang ïa ki symboh ksiar ki symboh rupa, kiba long ha ka dur jong ki ‘tien sneng ki ‘tien kraw, ki khana niam, ka jinghikai ïa ka akor ka burom bad kumjuh ïa ka jinghikai na u ‘riew tymmen u ‘riew san.
Ïa ka jingïalang la pynïaid da i Dr Herina Dohtdong, la ïoh ïa ka jingdwai na i Kong Imonlyne Ymbon, ka jingkren pdiang sngewbha na i Kong Mira Kharshiïing, ïa ki kyntien ai khublei la ïoh na i Kong Asorphi Diengdoh, bad kumjuh ïa ki jingrwai ba la ai da ka kynhun ka Tbian Ki Sur Hara.
