Shillong, Risaw 23
Ka jingrakhe Durga Puja jong ki riewngeit Hindu kan kut noh ha ka Sngi Ba-ar da ka jingleit pynngam um bad bret noh ïa ki blei thaw.
Ha kane ka sngi ba kut artad ka jingrakhe, ka Central Puja Committee (CPC) da ka jingïatreilang bad ki bor district, yn pynkhlaiñ ïa ka jingpahara ha kylleng khamtam haba ïaid ki paid riewngeit ban leit ai khublei khatduh ïa ki blei kiba la kit ban leit pynngam ha um bad bret syndon.
Na ka liang ka CPC ka la mana ban bret ïa ki blei sha kiwei pat ki jaka, hynrei dei ban lang sha kawei ka jaka kata, ha Immersion Ghat ha Polo kaba don harud Wah Umkhrah.
Ka CPC ka la mana ruh ban bret kulmar ïa ki jinglehniam bad ki tiar ki tar sharud shakiar, hynrei dei ban wanrah lang tang sha kawei ka jaka ban lum ban lang shi jaka.
Ka CPC kan buh ruh ïa ki volunteer kumba 100 ngut ban peit bad khmih ïa ka rukom pynïaid ïa ki riewngeit ha jaka bret blei thaw ha Immersion Ghat ha Polo, CS Point, Saw Furlong bad kiwei pat ki lad ki jaka shilynter ba ïaid ba leit ban wanrah ïa ki blei thaw sha ka jaka pynngam um khnang ban ïaid beit ka jinglehniam bad lait na kino-kino ki jingjia.
Ka CPC ka la ïathuh ba mynta u snem, ki don 243 tylli ki Community Durga Puja bad 11 tylli ki Durga Puja shimet ha Meghalaya, kiba kynthup 123 tylli ha Khasi Hills district, 11 tylli ha Jaiñtia Hills district bad 116 ha Garo Hills district.
Mynta u snem, ym don kano-kano ka Durga Puja Committee kaba lehkmen Jubili ha Shillong, hynrei ha Garo Hills, ka Bhaitbari DPC ka rakhe ïa ka Platinum Jubilee katba ka Tura Shiv Mandir DPC ka rakhe ïa ka Jubilee Rupa mynta u snem 2023.
