Nongstoiñ, Risaw 23
Ki nongïalam shnong ka Mawsiangbah, West Khasi Hills ki la pynpaw bad suba ba ka jingkhlad noh jong u rangbah Lostar Nongphud (40 snem ka rta) ïa kaba la lap pynban ïa ka met ïap jong u na kawei na ki wahrit kaba don ha u pud jong ka shnong Tiniang, hadien ba u la jah bad khlem wan phai ïing shuh na ka jingleit wad dieng kseh naduh ka 4 tarik u Risaw, 2023, ka lah ban dei na ka daw ba khie ka jingshitom.
Haba kren ha ki lad pathai khubor ha ka 23 tarik u Risaw 2023, kitei ki nongkitkam ka Mawsiangbah ki la ong ruh ba watla ka shnong ka don ïa ka jingsuba ba ka lah ban dei na ka jingshitom namar ba u shait don ïa ka jingpang ring, hynrei watla kata ruh ym lah ban ong kaba tikna namar ka jingtohkit jong ki pulit ka dang ïaid shakhmat.
Ha kajuh ka por, la ïathuh ba katkum ka jingïathuh ki bahaïing utei u rangbah ha ka 4 tarik mynta u bnai Risaw ha ka por ba mih na la ïing ban leit wad dieng kseh na khlaw ruh um da don ïa ka met ka bym shait bym khlaiñ.
Na ka liang ka shnong ka la ai ruh ka jingkhublei kaba kyrpang ïa baroh ki nongshong shnong ka shnong Mawsiangbah, ki bahaïing hasem, ka tnad pulit, bad kiwei pat ki shnong ba marjan kiba la ïatrei shitom ban wad ïa utei u rangbah watla ka la shim por haduh bun-bun sngi ban lap.
Kumban shu pynkynmaw ba ïa ka met ba dang sah jong utei u rangbah, la lap ha ka Sngi U Blei ha ki por 3:30 mynsngi bad la wan ban pynkit noh sha Civil Hospital, Nongstoiñ ban pyndep ïa ka ‘Post Mortem’ bad la ong ba ha kane ka sngi ba la pyndep noh ia ka jingleit ontep.
