Umroi (Meghalaya), Risaw 23 (UNI)
Ka India bad Malaysia ha ka Lah Sngi U Blei ka la sdang ïa ka ‘Joint Military Exercise’ kaba artaïew lynter ïa kaba la tip kum ka “Harimau Shakti – 2023” ha jaka ai jinghikai kaba ha Umroi Cantonment.
Ïa kane ka prokram la ju pynlong man u snem hapdeng ki kynhun shipai ka India bad Malaysia naduh u snem 2012. Ka kylla khatduh jong kaba kum katei ka prokram ai jinghikai ka la long ha Pulai, Kluang, Malaysia ha u Naiwieng, 2022.
Ki shipai ryngkew ba la pyntbit ka India jong ka Rajput Regiment bad ka 5th Royal Battalion ka Malaysia ki la ïashim bynta ha katei ka prokram ai jinghikai mynta u snem.
“Ka ‘Harimau Shakti’ ka thmu ban kyntiew ïa ka jinglah jong ki tnad shipai ban ïaid shakhmat bad ki kam bapher-bapher ha kano-kano ka bynta. Ha kane ka jingshah hikai, baroh 2 kynhun kin don la ki jong ki jong ki bynta ba kin shim,” la ong u Defence PRO ka Shillong, Wing Commander, Sreeprakash.
U la ong ruh ba baroh 2 kynhun ki shipai kin pyrshang ïatreilang na bynta ki kam ba ïadei bad ki jaka khlaw, khap sor, sor, ka jinglum jingtip bad ki ‘drill’ bapher-bapher.
“Kane ka prokram ai jinghikai kan sakhi ruh ïa ka jingpyndonkam ïa ki ‘Drone’, UAV bad ki Helicopter. Baroh arliang kin pyrshang ruh kumno ban khmih ïa kito kiba la khlad ne mynsaw bad kumno ban pynkynriah ïa ki. Baroh 2 kynhun kin ïakren halor ka jingïaid beit ïaid ryntih ki kam ki jam bad pyrshang ruh ïa ki rukom kumno ban im ha ka kyrdan jong ka Battalion,” la ong biang u Sreeprakash.
U la ong ruh ba katei ka prokram ai jinghikai kan pynleit jingmut nyngkong eh halor ka jingbit jingbiang ka met ka phad, ka jingïaid shakhmat bad ki ‘drill’ bad ka jingïasam ïa ki jinglong kiba paka tam para ma ki. Ka ‘Harimau Shakti’ ka thmu ban kyntiew ïa ka kyrdan jong ka jingïatreilang hapdeng ka tnad shipai ka India bad tnad shipai ka Malaysia ha ka liang ki kam ïada, ha kajuh ka por ban nang pynjan ïa ka jingïadei hapdeng kine ar ri, la ong u nongaiktien.
