Los Angeles, Risaw 23 (UNI)
Ki khlur ka Hollywood ki la pynmih da ka shithi paidbah ba la phah sha u President ka America, u Joseph R. Biden, ha kaba ki la kyntu ïa u ban ïarap ban pynthanda ïa ka jingïakynad hapdeng ka Israel bad Palestine.
“Ngi dawa na phi kum u President ka United States ban kyntu ban pynthanda ïa ka jingïakynad bad ban don noh da ka jingsangeh ïasiat ha Gaza bad Israel hashwa ba sa kawei ka mynsiem briew kan duh noh,” la ong katei ka shithi.
Ïa kata ka shithi la pynmih da ka Artists4Ceasefire, kaba dei ka kynhun jong ki khlur ka Hollywood. Haduh ka Sngi U Blei, kumba 95 ngut ki la soi ïa kane ka shithi paidbah.
“Baroh ki jingim ki long kiba kyntang la ki dei na kino-kino ki niam ne jaitbynriew. Ngi pynrem ïa ka jingshah pynïap ki nongshong shnong ka Palestine bad Israel.”
Haba pynpaw ba kiba bun na kito kiba hap ban mih na ki ïing ki sem ha Gaza Strip ki dei ki khynnah, poiwir bad ki pateng jong ki, kitei ki khlur ka Hollywood ki la ong ba dei ban ailad ïa ki lad jingïarap ban poi sha kine ki lanot.
“Ki khynnah bad ki longïing longsem ha Gaza kim don shuh tang ka bam ka dih, um, bording, dawai bad ka lad ban poi suk sha ki Hospital hadien ka jingshah ther bom kaba la neh da ki sngi,” la ong katei ka shithi.
Ha kajuh ka por ki la kyntu ïa baroh ki nongïalam jong ki Ri ban burom ïa baroh ki jingim ha ka Holy Land bad ban kyntu bad ha kajuh ka por ban trei na ka bynta ban don noh da ka jingsangeh ïasiat bad ban pynkut ïa ka jingther bom ïa ka Gaza bad ban pyllait suk ïa kiba la shah rahbor.
