Shillong, Risaw 23
Ka Voice of the People Party ha ka Lah Sngi U Blei ka la pynrem jur ïa ka jingbym suitñiew jong ka sorkar Meghalaya Democratic Alliance (MDA) ïa ka jingsngew jong ki paid riewngeit Khristan da kaba pynlong ïa ka tamasa Cherry Blossom wat ha ka Sngi U Blei.
Ha u kyrwoh khubor, u Dr Batskhem Myrboh, uba dei u nongaiktien jong ka VPP, u la ong ba kane kam dei ka sien ba nyngkong ba kane ka sorkar ka pynlong ïa ki prokram ha ka Sngi U Blei namar ka la leh ïa kane ka kam wat ha ki por ba la leit noh.
Na ka liang ka VPP ka la dawa ba ka sorkar ka dei ban pynkylla noh ïa ki tarik jong kane ka tamasa.
Lah ban kdew ba kata ka tamasa ba la ai kyrteng Shillong Cherry Blossom Festival 2023 yn pynlong ha ka 17, 18 bad 19 tarik Naiwieng, 2023 ha madan Kurkalang kaba don ha Bhoirymbong, Ri Bhoi distrik.
Ha katei ka tamasa Shillong Cherry Blossom Festival, yn sa don ki nongrwai bapawnam jong ka pyrthei kiba kynthup ïa u Ne-Yo, Ronan Keating, Sanam, Jonas Blue, Pink Panda, Kenny Musik, SURL bad kiwei kiwei.
Shuh shuh ha katei ka sngi kin sa don ruh ki nongrwai bad ki kynhun nongrwai bapawnam jong kane ka jylla kiba kynthup ïa ka Meba Ofilia, u Bah Lou Majaw, Blue Temptation, Da Minot, Rhem, Dalariti, Wanjop Sohkhlet, Snow White, Banjop bad kiwei de ki kynhun rwai na ki jylla shatei lam mihngi ka ri.
Ha katei ka tamasa kan sa don ruh ka Miss bad Mr Cherry Blossom Pageant, ka Cosplay Competition, ka Choir Contest bad ka Karaoke Contest, ka Singing Contest bad kiwei kiwei ki jingïalehkai.
