Shillong, Risaw 24
Ka Hynñiewtrep National Youth Front (HNYF) East Khasi Hills District ka la nang ïai bteng ban pynlong ka jingkhynra ïa ki dukan thoh ‘teem’ kiba don ha Shillong ha kaba ha ka 24 tarik mynta u bnai, ka seng ka la leit ban khynra laisen sa ïa ki dukan kiba don hapoh Ïew Thembasuk, Shillong ïa kaba la sdang ban khynra naduh Sawlad ter ter.
Ha katei ka jingkhynra ka seng ka la lap ba kiba bun na ki dukan ki la sdang ban pynbiang ïa ki kot ki sla kum ka laisen bad kiwei kiwei ki kot kiba donkam. Hynrei ka la phah khang mardor pat ïa kito ki dukan ki bym pynbiang satia ïa ka laisen jong ki ban pynïaid ïa ka dukan thoh ‘teem’.
Kumta na ka liang ka seng kan dang ïai bteng ïa kane ka jingkhynra kot laisen ha ki dukan thoh ‘teem’ nangne shakhmat.
Haba kren sha ki lad pathai khubor ha katei ka sngi, ka seng ka la ong ba la ïohi ba kiba bun ki kyrteng ha ki laisen ki dei jong ki Khasi, hynrei kiba shong bad pynïaid ïa ka kam pat ki dei ki mynder ri.
“Ngi na ka liang ka seng ngin nym shong kli-kti ïa kum kine ki kam kiba pynïaid beaiñ khamtam kito ki bym don laisen bad kine ki bar jylla, ngin nym ailad hi ruh ba kin wan leh khaïi pateng da kaba suk hangne ha ka ri u hynñiewtrep jong ngi”, la ong ki nongïalam ka seng.
Shuh shuh ka seng ka la ong ba lyngba kane ka jingkhynra la lap ba kiba bun ki dei kiba leh ‘benami’ ïa ki kam da kaba ai kyrteng sha ki Khasi katba ka kam pat ka dei jong ki mynder ri. Namar kata, na ka liang ka seng ruh ka la pan da ka jingpynshai halor kane ka kam na kitei ki trai dukan. Nalor kane, ka seng ka la ong ruh ba kan sa ujor halor ka jingleh jong kitei ki dukan thoh ‘teem’ kiba don ïa ka laisen jong u Hynñiewtrep Indigenous Archery Organizers Institute katba la pynïaid da u nombar jong u Khasi Hills Archery Sports Institute.
Na ka liang u Bah Orester Mawlong uba dei u dkhot ka sengkmie, u la ong ba kaba sngewlyngngoh ka long ba kumno ki ïoh ka laisen jong u Hynñiewtrep Indigenous Archery Organizers Institute katba ki la die ïa u nombar jong u Khasi Hills Sports Institute. Nalor nangta u la ong ba ka seng kan dang ïaid shakhmat ban leh ïa katei ka kam khnang ba ka khajna ruh kan poi sha ka sorkar.
