Jowai, Risaw 24
Ka Indian Red Cross Society (IRCS), West Jaiñtia Hills District ha ka sien kaba nyngkong eh ka la pynlong ïa ka jingsynñiang snam sngewbha ha ka jaka kynshew snam kaba don ha Panaliar.
Shwa ka jingsynñiang snam ka la don ka jingïalang kaba la pynïaid da u Bah W Lyngdoh, Chairman Indian Red Cross Society, West Jaiñtia Hills District, u Bah H Nongpluh, Assistant Secretary, IRCS West Jaiñtia Hills u la pule ïa ki kyrteng jong ki dkhot ki ban synñiang snam, katba u AN Sawian, General Secretary ka Indian Red Cross Society West Jaiñtia Hills District u la ai ki jingkren lyngkot.
Ka Dr. P. Shylla, Medical & Health Officer Blood Centre Jowai Civil Hospital ha ka jingkren ka la ïaroh bad ai khublei kyrpang ïa kito kiba kloi ban ai sngewbha ïa ka snam bad lyngba ka jingkylluid mynsiem jong ki, la lah ban pynim ïa kiba bun ki mynsiem briew bad ha kajuh ka por kala pynshlur ïa baroh ki nongai snam sngewbha ban ïai bteng ïa ka kam ba bha.
Ïa ka jingïalang la pynkut da ki jingkren khublei na u Bah Ohiwot Laloo, Secretary Indian Red Cross Society, West Jaiñtia Hills. Ha kane ka sngi la don 17 ngut ki dkhot ka Indian Red Cross Society kiba la synñiang snam sngewbha sha kane ka jaka kynshew snam.
