Gaza, Risaw 24 (UNI)
Kumba 2,000 ngut ki khynnah ki la shah pynïap ha Gaza Strip ha ki 17 sngi ba la leit noh namar ka jingïakynad hapdeng ka Israel bad ka kynhun pyntriem Hamas, la ong ka kynhun treimon sngewbha – Save the Children.
“Kumba 2,000 ngut ki khynnah ki la shah pynïap ha Gaza ha ki 17 sngi ba la leit noh namar ka jingther bom ba khlem sangeh kaba la pynkhyllem ïa kiba bun bah ki ïing ki sem ha baroh kawei ka Gaza Strip,” la ong katei ka kynhun ha u kyrwoh khubor.
Nalorkata, la ong ruh ba kumba 27 ngut ki khynnah ki la shah pynïap ha ka thaiñ West Bank.
“Ngi kyntu ïa baroh ki mamla ban shim ïa ki sienjam ban ïada ïa ki khynnah, bad ngi kyntu ïa ki nongïalam ki Ri ka pyrthei ban kyrshan ïa kita ki sienjam. Dei ban leh lut ïa kat kaba shah ka kam na ka bynta ban ai jingïada ïa ki khyllung khynnah ba kin lait na ka jingma jingmynsaw – bad ban ai jingkyrshan ïa ki,” la ong u Jason Lee uba dei u Country Director ha Palestine jong ka kynhun Save the Children.
Ha ka 7 tarik Risaw, ki lehnoh Hamas ki la thombor ïa ka Israel na ka thaiñ Gaza Strip. Kum ka jingpynhiar kput, ka Israel ka la ther da ki bom bad la pynsangeh ruh ïa ka jingphah ïa ki marbam, umbam bad bording nalor ka umphniang sha Gaza Strip kaba don palat 2 million ngut ki nongshong shnong. Namar ka jingjur jong ka jingïakynad, da ki hajar ngut ki briew ki la shah pynïap ha baroh arliang – Israel bad Gaza Strip.
