Jowai, Risaw 24
Ryngkat bad kiwei ki riewngeit Hindu, ki riewngeit ka niam Hindu kiba shong basah ha rilum Jaiñtia ruh ki la pynkut noh ïa ka lehniam Durga Puja kaba ju long shisien shisnem.
Kane ka lehniam Durga Puja la pynkut ha ka 24 tarik Risaw hapdeng ka iphuh-iphieng. Ka jinglehniam puja ha Jowai, Nartiang, Dawki bad East Jaiñtia ka long kaba ïaid beit ïaid ryntih khlem kano kano ka jingpynwit pynthut.
Ha nongbah Jowai ïa ka lehniam la pynïaid da ka Sarbajanin Durga Puja Committee ha kaba ïa ka lehniam lehrukom la pyndep ha Shiv Madir kaba don ha Iawmusiang Jowai.
Ha ka nohphai sngi, ki paid riewngeit ka niam Hindu ki la ïamih paidbah da kaba pynkit ïa ka blei thaw ha ka kali ban leit bret ïa ka Blei Durga ha wah ha ka jingsynran lang ki longkmie bad ki khynnah kiba la shad lynter lynti naduh na Shiv Mandir haduh ban poi ha wah Myntdu kaba don ha Pohkhyllem kaba la synran lang ruh da ki bor pynïaid distrik.
Hadien ba la pynngam um ïa ka blei bad teh ïa ka da u tyllai khnang ban suk pynkhuid bad ban ïada bad pynneh pynsah ïa ka jingkhuid jingsuba jong wah.
Katba ha Nartiang ïa ka lehniam Puja la sdang na Mandir ha kaba u Pandit u Oni Maskut Deshmukh u la rah marwei ïa ka Blei Durga kaba la shna ha ka dur jong ka pashor kait naduh na Mandir shaduh wah Myntang ha jingsynran jong u Dolloi, ki Pator, ki Lyngdoh bad katto katne ngut ki riewngeit Hindu lait noh ki kynthei.
Ha kane ka sngi la pyndep ruh ïa ka lehniam shad mastieh da u Dolloi ka Elaka Nartiang u Salong Lamare ryngkat bad ki pator bad ki lyngdoh jong ka Elaka.
Hashwa ban pynngam um ïa ka Blei Durga ka la don shwa ka jinglehniam harud katei ka wah kaba la kñia da uwei u blang kynsai bad hadien katei la pyllait sa ïa ka paro.
Ka jinglehniam Puja ha Nartiang ka long kaba ïaid beit ïaid ryntih khlem kano-kano ka jingpynwit pynthut.
Ha East Jaiñtia Hills District, ïa ka blei thaw la leit bret hajan ka wah Kyrkhuh khla kaba don ha Lad Rymbai Bypass.
