Shillong, Risaw 24
Ka jingïakren ha kine ki sngi ka dei shaphang ka jingburom ïa ki sngi kyrpang jong ki riewngeit kiba don ha ki jingngeit niam bapher bapher.
Ka don ka jingïakren ban khang ïa kiei-kiei ha ki sngi kyrpang khamtam ha ka Robibar namar ka dei ka sngi kyrpang ki Khristan.
La sakhi ha ka Sngi Ba-ar kaba dei ka sngi kyrpang jong ki riewngeit Hindu, ba ki dukan ki la khang lut ha Ïewduh bad kiwei ki jaka namar ka dei ka sngi kyrpang jong ki, kata ka jingpynkut ïa ka Durga Puja.
Ki dukan die dawai ruh ki khang namarba kiba dei trai dukan, ki dei kiba hap leit shimbynta lang katkum ka jingngeit niam jong ki. Ka jingkhang ki dukan kiba dei trai da ki bym dei Khasi ha kum kane ka sngi, ka buh jingeh ïa kiwei pat khamtam haba donkam ban thied dawai na ka bynta kiba pang kiba shitom.
Kumta kane ka mih sa kawei pat ka mat ban ïakren. Ha ki sngi kyrpang ki Khristan ruh, kum ha ka Robibar, ki Khristan kin nym plie dukan bad kin khang kumba khang kine kiwei pat ki riewngeit. Kane ruh ka buh jingeh lada dei ba ym plie dukan sa kito kiba don ha kiwei pat ki jingngeit, kum ki Hindu, Muslim bad kiba don ha ka niam Khasi tynrai.
Kine ki plie ïa ki dukan jong ki la ka dei ha ka Robibar lane kiwei kiwei ki sngi ba ki Khristan ki ñiew kum ki sngi kyrpang, bad ka long ka jingïarap ïa baroh kiba donkam kyrkieh ban thied dawai ne kiwei ki jingdonkam.
Lada dei ba ki Khasi ki khlaiñ ka khaïi ka pateng bad pynïaid hi ïa ki dukan ha ki jaka ïew kum ha Ïewduh bad Khyndai Lad, ki paidbah kin nym mad jingeh ha kum kane ka sngi kyrpang, bad ki jaka long ïew ruh lehse, kin nym kynjah ha kum kane ka sngi.
Kumta ka jingmih na kane ka rukom kheiñ ïa ki sngi kyrpang ka long ba ki nongshong shnong ki donkam markylliang ïa ki sngi ban plie dukan khamtam eh ban nym mad jingeh haba mih ki jingdonkam kiba kongsan tam kum ka dawai dashin.
Namar kata, ki sngi ki long kiba donkam lut na ka bynta ki nongshong shnong, bad la ñiew kum ki sngi bakyrpang ha la kijong kijong ki jingngeit niam.
