Shillong, Risaw 24
Da ki hajar ngut ki riewngeit Hindu na kylleng ki jaka jong ka nongbah Shillong ha ka Sngi Ba-ar ki la leit ban pyndep ïa ka jingpynngam um ne ka jingbret ïa ki blei thaw hapoh ka Wah Umkhrah.
La ïoh ban sakhi ba ki riewngeit Hindu naduh ka por mynstep ki la ïalum ha ki pandal kaba ki don ha kylleng ki bynta na ka bynta ban lehniam khatduh shwa ban rah ban leit bret noh ïa ki dur blei thaw hadien jong ka jingkut noh ka lehniam Durga Puja, kaba dei kawei na ki jinglehniam kaba heh jong ki paid riewngeit Hindu.
Ha kane ka sngi la sakhi ruh ba ki paid riewngeit Hindu ki la mih na ki pandal ryngkat ki blei thaw ba la kit ha ki trok ryngkat ka shad ka kmen ban synran lang ha ka jingleit bret sha Wah Umkhrah.
Kane ka jinglehniam kaba saw sngi lynter ka la sdang naduh ka 21 tarik haduh ka 24 tarik mynta bnai Risaw bad la pynkut ïa kane ka lehniam kaba shisien shisnem da kaba leit pynngam noh ïa ki blei thaw ha ki wah.
Kane ka jingbret blei thaw ka la sdang naduh ka por mynstep ha kaba ki riewngeit Hindu ha nongbah Shillong, ki la ïamih na la ki Puja Pandal ban bud ïa ka kali kaba kit ïa ka bleithaw ban leit bret ha Wah Umkhrah.
Ki nongïalam jong ka Central Puja Committee, ki la ïathuh ba mynta u snem, ki don 250 tylli ki Puja Mandal Committee ha ka jylla Meghalaya bad tang ha nongbah Shillong ki don 64 tylli. Kat haduh ka por 2:30 noh phai sngi ki la don kumba 18 tylli ki Puja Pandal kiba la wan bret blei ha Wah Umkhrah, Shillong.
Ha kane ka sngi ki bor pynïaid distrik ruh ki la pynjur ïa ka jingpahara ha kylleng ki jaka ban pynthikna ba kane ka jinglehniam lehrukom ki Hindu kan long kaba ïaid beit ïaid ryntih.
