Shillong, Risaw 24
Ka Achik Holistic Awakening Movement (AHAM) ka la kyrpad ïa u Myntri Rangbahduh ka Ri u Narendra Modi ba un tuklar na ka bynta ban pynrung mardor ïa ka ktien Garo ha ka Khyrnit Baphra jong ka riti synshar ka Ri.
Ha ka dorkhas sha u Modi, u President ka AHAM George Prince Ch. Momin u ong, “Na ka liang jong ka seng bad kumjuh ruh na ka jaidbynriew Garo nga kyrpad ban kynthup ïa ka ktien Garo kum kawei na ki kyntien ba la ithuh ha ka Khyrnit Baphra bad kyrpad ïa ka shlem treikam u Myntri Rangbahduh ba kin eksamin ïa ki jingdawa ki jong ngi.”
U la ong ba ha ki snem kiba la leit, ka Sorkar Kmie ka la pynrung bun ki ktien bapher bapher jong ka Ri hapoh ka Khyrnit ba Phra jong ka riti synshar ka Ri halor ka jingai jingmynjur jong ki committee bapher bapher hynrei ki don pat ki committee kum ka Pahwa Committee (1996) bad ka Sitakant Mohapatra Committees (2003) kiba dang bun ki jingduna halor ki jingdonkam na ka bynta ban pynrung ïa ki ktien hapoh ka Khyrnit Baphra.
Ha u snem 2003, ka Constitutional Amendment kaba 93 kaba la mynjur, ka la ailad ïa ka Sorkar ba kan peit thymmai biang ha ka ban pynrung ïa kiwei pat ki ktien jong ka Ri hapoh ka Khyrnit Baphra, ha kaba ki saw tylli ki ktien ba kynthup ïa ka Bodo, Dogri, Santali bad Maithili ki la ïoh rung hapoh katei ka Khyrnit.
“Ngi kum ki nongshong shnong jong ka rilum Garo, ngi la don ka jingkhmih lynti ba ka ktien Garo kan rung noh ha ka Khyrnit Baphra, namarkata, ngi kyrpad ïa phi ba phin peit bniah ïa ka jingkyrpad ka jong ngi ban pynrung noh ka ktien Garo hapoh ka Khynrit Baphra,” la ong u Momin.
