Shillong, Risaw 24
Ka Meghalaya United Christian Forum (MUCF) ka la kyrpad ïa ka Sorkar Jylla ban pynkynriah noh ïa ka tarik pynkut jong ka tamasa dienglieng ne ‘Cherry Blossom Festival’ sha kawei pat ka sngi da kaba burom ïa ki jingsngew jong ki lak ngut ki Khristan hapoh ka Jylla.
“Ka MUCF ka ngeit ba man ka sngi ka dei ka jingaisngewbha na U Blei, hynrei ka Sngi U Blei ka dei ka sngi khuid jong ka jingmane paidbah na bynta ki Balang bapher-bapher lait noh ki katto-katne ki kynhun Balang kiba pynlong ïa ka jingmane ha kawei pat ka sngi,” la ong u Shong-knor ka MUCF, Rev. Batkupar Dunai ha ka kyrwoh khubor.
Haba phai sha ka ‘Cherry Blossom Festival’ kumba la paw ha ki lad pathai khubor ba kan kut ha ka Sngi U Blei, ka MUCF ka kyrpad ïa ka Sorkar Jylla ban pynkynriah noh ïa ki prokram pynkut ba la tyrwa sha kano-kano ka sngi da kaba burom ïa ki jingsngew jong ki lak ngut ki Khristan hapoh ka Jylla kiba ñiew ïa ka jinglong khuid bad jingburom ïa ka Sngi U Blei kum ka sngi bakhuid na bynta ki Balang ban pynlong ïa ki jingduwai, jingmane bad ka jingïadei jong ki ‘riewngeit Khristan khlem ka jingpynthut na kino-kino ki jingïalang khamtam ki prokram heh.
Kumban shu kdew hangne, ka Khasi Jaiñtia Christian Leaders Forum (KJCLF) ka pynshai ba ka kynhun kam don ka jingpyrshah ïa ka jingpynlong tamasa jong ka Sorkar Jylla, hynrei ka kwah ban pynskhem bad kren shai ba ka Sngi U Blei ka long ka sngi kaba khuid bad kyntang na ka bynta ki ‘riewngeit Khristan bad ki Balang.
Ha kawei pat ka liang, ka Joint Action Committee (JAC) kaba kynthup ïa ki kynhun Seng bapher bapher na Ri-Bhoi ka la rai ban ïeng tylli bad ban dawa na ka Sorkar ba ka dei ban pynkynriah noh ïa ka tarik pynkut jong ka tamasa ‘Cherry Blossom’, bad ym ban pynkut ne pynlong ha ka Sngi U Blei.
Katei ka JAC ka kynthup ïa ka Hynñiewtrep Youth Council (HYC), Meghalaya People United Front (MPUF), Ri-Bhoi Youth Organization (RBYO), United Hynñiewtrep Movement (UHM), Saiñdur Tipkur Tipkha Ehrngiew Hynñiewtrep (STIEH) bad ka Meghalaya People’s Social Organization (MPSO).
Na ka liang ki nongïalam ka JAC ki la maham ba lada ka Sorkar kam sngap bad kam pynkynriah bad ïaid beit ban pynkut ïa katei ka tamasa ha ka Sngi U Blei, kin ym ailad satia hynrei kin pynlong da ka jingïakhih.
Ha kajuh ka por, ka Voice of the People Party ha ka Lah Sngi U Blei ka la pynrem jur ïa ka jingbym suitñiew jong ka Sorkar Meghalaya Democratic Alliance (MDA) ïa ka jingsngew jong ki paid ‘riewngeit Khristan da kaba pynlong ïa ka tamasa ‘Cherry Blossom’ wat ha ka Sngi U Blei.
Na ka liang ka VPP ka la dawa ba ka Sorkar ka dei ban pynkylla noh ïa ki tarik jong kane ka tamasa.
Hashuwa, u Myntri ka tnad Kam Jngohkai Pyrthei ka Jylla, u Bah Paul Lyngdoh u la ong ba ka Sorkar kam shym la pynbor satia ïano-ïano bad la ieh ha ka mon ba laitluid jong ki paidbah, bad ai kiba sngewtynnad kin leit bad ki bym sngewtynnad kin ym leit sha kata ka tamasa ‘Cherry Blossom’ ïa kaba yn pynkut ha ka Sngi U Blei.
U suba ruh ba ka jingmih jong ki jingpyrshah ka paw kumba ka don ka buit politik kaba don na sha lyndet bad ba ki don ki bor kiba pyrshang ban khang lad ïa ka jingkiew jong ka kam jngohkai.
Lah ban kdew ba kata ka tamasa ba la ai kyrteng ‘Shillong Cherry Blossom Festival 2023’ yn pynlong ha ka 17, 18 bad 19 tarik Naiwieng, 2023 ha Madan Kurkalang kaba don ha Bhoirymbong, Ri-Bhoi distrik.
