Shillong, Risaw 24
U Bah Poland Sohphoh uba dei u Superintendent ba la shongthait jong ka tnad Enforcement ka Khasi Hills Autonomous District Council (KHADC), Shillong u la ïathuh ba ka Council ka la dep mad lypa ïa ka jingkhang pom dieng ha u snem 1997 bad mynta kam duh tulop shuh haba la khang dewïong.
Kumban shu pyntip ba u Bah Poland Sohphoh u la shongthait kum u ophisar na KHADC ha u snem 2017. Nangta ha u snem 2018 u la rung sha ka saiñpyrthei ban ïakhun ïa ka ilekshon MLA na Mawkyrwat constituency na ka BJP.
U la ai jingïaroh ïa ki CEM, ki EM bad ki ophisar ka KHADC kiba la trei shitom namar ki nongtrei ki khlem duh tulop kumba duh tulop kiwei ki District Council hapoh ka jylla.
U la pynpaw ba ka jingduh tulop kiwei ki council ka lah ban dei ba ki pyndonkam ïa ka pisa jong ka council ban pyndonkam ban pyntrei ïa ki kam pynroi sha ki paidbah.
U la pynkynmaw ba ka jingduh tulop ka KHADC ka dei tang ha u snem 1984 ha ka por ba ka sorkar jylla ka dang ïakhun ban shimti noh halade ïa ki skul ba pynïaid ka council hynrei haduh mynta ka council kam pat shah ktah ha ka tulop.
U la pyntip ba ha ki snem ba mynshuwa ka KHADC ka ïoh khajna bha na ki mar khlaw khamtam lei ha ka por ba dang jur ka jingpomdieng hynrei kam shym la duh tulop bad mynta haba khang dewïong kam shym la duh tulop namar ka la dep mad ha ki por mynshuwa.
“Ngi hap ban sngewnguh ïa ki nongïalam barim namar ha ka kam shakri paidbah don ki por ba ki shah krenbeiñ bad don ki por ba ki shah ïaroh hynrei lada ïanujor u dang heh kyrdan u Secretary ka KHADC uba peit ïa ki saw tylli ki district ban ïa u Deputy Commissioner ka East Khasi Hills District uba peit tang kawei ka distrik” u la ong.
Kumta u la kyntu ïa ki ophisar kiba don mynta ba kim dei ban khaw eit hynrei ki dei ban ïaid beit shakhmat khlem da donkam ban kyllan umphniang ïalade ne ïa kiwei.
U la ai khublei ba ka khajna kaba heh ha KHADC ka dei ka khajna bad khaïi. Kumta lada don ki bym pat pynthymmai ïa ka laisen khaïi dei ban daiñ kuna beit ha ka jaka ba ki lap.
