Shillong, Risaw 24
U President ka Voice of the People Party (VPP), Bah Ardent Miller Basaïawmoit u la ong ba ka jingkren jong u ha kawei na ki jingïalang kaba la long dang shen ha Pynursla ka long ban pynshai sha ki paidbah bad kam don kano-kano ka jingthmu ban pyrshah ne kdew kti ïa kano-kano ka lad pathai khubor.
Kumban shu kdew hangne, ka Meghalaya Editors’ & Publishers’ Association (MEPA) ha ka Lah Sngi U Blei ka la leit ban ïakynduh ïa u Bah Basaïawmoit ban ïoh jingshai na u halor katei ka bynta.
“Phi lah ban ong ba ka jingïakynduh jong nga bad ki nongïalam ka MEPA ka long kaba sngewtynnad, seisoh kaba nga la ïoh ban pynshai ba ka jingkren jong nga ha ka jingïalang paidbah ha Pynursla ka dei ka jingthmu ban pynshai sha ki paidbah bad nga la pynpaw ruh ha ki ba ngim don kano-kano ka jingthmu ban kren pyrshah ïano-ïano, ngim kwah ruh ban kdew kti ïa kano-kano ka lad pathai khubor hynrei ngi kwah ban pynshai ïa u paidbah,” la ong u President ka VPP.
U la ong ruh ba u paidbah u donkam ban long uba stad, uba sian bad uba sngewthuh ban bishar kino ki khubor kiba dei bad kino ki bym dei, kumjuh kino ki khubor kiba shisha bad kino ki bym shisha.
“Haba nga kren ha kato ka sngi, nga pynpaw ba ym tang ha kiwei-kiwei ki ri jong ka pyrthei, lane ha India lane wat hangne ki don kita ki ‘Paid News’ bad ki khubor lamler – kaba mut ki paidbah kin hap ban sngewthuh. Ngi kwah ban hikai ïa ki paidbah bad nga da ong hi ruh ba ha kiwei-kiwei ki Jylla, ki siew da ka pisa ban pynmih khubor, ka donkam namarkata ïa u paidbah ban long uba stad,” la ong biang u Bah Basaïawmoit.
Haba pynshai ba ka jingkren jong u ha katei ka jingïalang kam shym la kynnoh ne kynthoh ïa kano-kano ka lad pathai khubor, u la ong ba mynta kim don shuh tang ki khubor kiba don baroh shi katta naduh ki por mynshuwa, hynrei ki la mih sa ki ‘Youtuber’ shimet ki bym lah ban khang bad mano-mano u lah ban lum bad pyllait khubor.
“Te ka khubor kaba kumno kan leit sha u paidbah,” u la ong da kaba bynrap ba ka kamram jong ka seng ka long ban hikai ïa u paidbah bad u kyrmen ruh ba lada shim ïa katei ka jingkren jong u kum kaei-kaei ka ban ïatei, kan long kaei-kaei kaba bha lada kito kiba don ha ki lad pathai khubor ki shim ïa ka kum kaei-kaei ka ban tei.
U la ong ruh ba ka jingkren jong u kan pynpyrkhat la ka long ïa ka Sorkar ne kano-kano ka liang ba ym dei ban pyndonkam bakla ïa ki lad pathai khubor bad ba ki lad pathai khubor ruh kin pyrkhing bad khmih bniah ba ka khubor kaba ki pynmih kan long ka ban tei bad ym ka ban ïalam bakla namar ka jingdon ki lad pathai khubor ka long ban ai jingtip sha ki paidbah.
“Kam dei tang ka kam jong ki seng saiñ pyrthei kaba lah ban pynbha ïa ka jingmut jingpyrkhat u paidbah hynrei ki lad pathai khubor ki don ïa ka bynta kaba khraw ban saiñ dur ïa ka jingmut jingpyrkhat jong u paidbah,” u la ong.
“Ngim don kano-kano ka jingthmu kaba ngi thew pyrshah ïano-ïano napdeng ki lad pathai khubor. Ngim kwah hi ruh bad kam dei ka kamram jong ngi ban kdew kti ïa kano-kano ka lad pathai khubor,” la ong utei u nongïalam.
Shuh shuh u la bynrap, “Ngam don kano-kano ka jingthmu kaba sniew, lehse nga lah ban dei uwei na ki MLA uba sngewkhia ïa ka jingeh jong kito kiba don ha ki lad pathai khubor bad uba la pynsngew ruh ïa ki jingeh jong ki ha ïingdorbar thawaiñ.”
