Mawkyrwat, Risaw 24
Ka seng Hynñiewtrep Achik National Movement (HANM) Kalong Unit ha ka step jong ka 24 tarik mynta u bnai ka la ïoh ban bat shi kali ki bar jylla ki bym don bad biang ki kot ki sla hapoh shnong Kalong ha South West Khasi Hills District kiba mut ban leit bylla sha Nongjri.
Ha kaba ïadei bad kane, na ka liang u President ka HANM Kalong unit u Bah Columbus Thongni, u la buh jingmaham ïa ki briew kiba wanrah briew nabar jylla ki dei ban pynbit pynbiang shwa ïa ki kot ki sla, ha kajuh ka por ka seng ka kyntu ruh ïa ki Malik Khasi ba ki dei ban ai bylla da ki paradoh parasnam.
Ka seng ka la byrngem ruh ba shen kan sa leit ban khynra ïa ki kot ki sla jong ki bar jylla hapoh ka District khamtam ha ka thaiñ Nongjri kaba la sdang jyllei ki bar jylla.
Ka seng hynne ka step ka la ïoh ban pynphai noh ïa hynriew ngut bar jylla sha Assam ki bym biang ki kot ki sla bad ka labour license.
