Shillong, Risaw 24
Ka jingpynkhreh ïa ka ilekshon MP Lok Sabha na Shillong Parliamen-tary konstitwensi na ka seng UDP ka la sdang ban shongshit namar ki la don bun ngut ki ‘riew rangbah kiba la pynpaw ba ki kwah ban ïakhun ïa kane ka ilekshon.
Ha kine ki sngi la mih ka kyrteng u Bah PT Sawkmie MLA barim ka Mawlai kosntitwensi, Bah Robertjune Kharjahrin President barim ka HYC Sengkmie ban ïakhun ïa ka ilekshon MP Lok Sabha bad Bah Jemino Mawthoh MLA barim ka UDP na Nongthymmai konstitwensi.
Haba pyrshang ïakren bad u Bah Titos Chyne uba dei Working Presi-dent ka UDP Sengkmie bad MDC ka Sohra konstitwensi u la ïathuh ba ka jingmih ki kyrteng ha kine ki sngi ban ïakhun ïa ka ilekshon MP ka dei tang ka jingpynsngew.
U la ïathuh ba ka UDP ka la pynbeit ban shong pyrkhat ïa ka ilekshon MP ha ka 19 tarik mynta u bnai namar ka jingbunkam palat ki para nongïalam la hap ban sangeh noh.
Nangta, u la ïathuh ba u Bah PT Sawkmie bad u Bah Robertjune Kharjahrin ki la pynpaw hi ha ki nongïalam ka UDP ba ki kloi ban ïakhun ïa ka ilekshon MP lada ka seng ka ai ïa ka tiket.
Nalor kata, u la ïathuh ba nalor kitei ki kyrteng ka la don ruh ka jingtyrwa sa ïa ka kyrteng jong u (Titos), Bah Paul Lyngdoh, u Dr. DRL Nonglait bad u Bah Jemino Mawthoh.
U la ïathuh ba u Dr. DRL Nonglait u la pynpaw ba lada ka seng ka aiti u kloi ban ïakhun ïa ka ilekshon MP hadien ba ki nongïalam ka UDP ki la ïoh ban ïakren.
“Haduh mynta ngim pat shim ïa ka rai ïano yn jied napdeng kine kiba paw kyrteng hynrei ngin sa shim hi noh ïa ka rai mynta u snem ban pynbna ïa u kyrtong khnang ban pynithuh noh ïa ki paidbah” u la ong.
U la pyntip ruh ba ïa kine ki kyrteng ka State Election Committee kan sa peit bniah namar ki don ki kyrteng kiba la shu wan ban tyrwa bad don ki kyrteng ba ki kwah ban ïakhun ïa ka ilekshon.
Kum ban shu kdew ki seng saiñpyrthei kiba la dep pynpaw ïa ki kyrteng ban ïakhun ïa ka ilekshon MP Lok Sabha ki long ka seng Congress kaba la don lypa ïa u MP ba mynta u Bah Vincent H Pala, u Dr. Ricky Syngkon na ka VPP, ka UDP ka dang wad kyrtong bad ka NPP ka dang ïohthiah haduh mynta namar kam pat pynbna kyrtong.
