Nongstoiñ, Risaw 24
Ki kynhun seng bapher bapher na West Khasi Hills District ba kynthup kum ïa ka West Khasi Student Union, Western Youth Federation, Meghalaya Youth Federation Sengkmie lem bad ka United Hynñiewtrep Movement Nongstoiñ Circle ki la pynpaw ka jingbym sngew ïahap ban pynlong ïa ka tamasa Cherry Blossom kaba hap ruh ha ka Sngi U Blei.
Kine nongïalam jong ki kynhun seng ki la pynpaw ruh ba ki ai ka jing-kyrshan kaba pura ïa ki nongïakhih pyrshah ïa ka jingpynlong ïa katei ka tamasa ha ka Sngi U Blei.
Nalor nangta, ki la pynrem ruh ïa ka jingkren u Myntri Sorkar u Bah Paul Lyngdoh uba la kren ha ki lad pathai khubor da kaba ong ba baroh ki sngi ki long kiba khuid, ha kaba na ka liang jong ki, ki la ong ba yn nym lah ban ïanujor ïa ka jingkhuid ka Sngi U Blei bad kiwei pat ki sngi kata da kaba ki la pynshong nongrim na ka jingthoh na ka ktien U Blei.
“Ngi sngew pyrshah jur ïa kane ka jingpynlong tamasa ka bym sngew don jingmut ruh haei haei kaba hap ban pynlong ha ka Sngi U Blei, lada dei kiwei kiwei ki kam lehse ka bym lah kiar ïa kata ym lah ban ong hynrei tang ban rakhe ïa kata ka jingpuh syntiew ki dieng hato ym don por mo ban leh ha kiwei kiwei ki sngi,” la ong u Bah Willstone Sohshang, President ka HANM West Khasi Hills.
U Bah Willstone u la ong ba kum ki Khristan ki kheiñ ba ka Sngi U Blei ka long kaba khuid da kaba pynshong nongrim ruh na ka ktien ka jong U Blei.
U la ong, “Ngi la ju ïohi ba baroh kawei ka Ri India ki rakhe ïa ka sngi khuid jong ki Khristan bad ngi ruh ngi ju rakhe ïa kiwei kiwei ki sngi khuid jong kiwei ki para riewngeit kum ki Hindu, Muslim bad wat ki tnat ophis sorkar kim ju pynlong ophis ne treikam ha ka Sngi U Blei, hato ki tnat treikam ka sorkar ha ka Jylla don mo kawei ka ophis kaba trei kam lane kaba plie ha ka Sngi U Blei, ym don kaba treikam, ngi tikna ba wat ka Secretariat ruh ka khang ha ka Sngi U Blei”.
U Bah Willstone u la bynrap ruh da kaba ong, “Lada ki ong ba baroh khoit ki sngi ki long kiba khuid, ngi kyrpad ïa ki nongïalam jong ngi ba kin trei baroh shitaïew bad lada kim lah ban trei kata ka la pyntikna ba ka Sngi U Blei ka dei ka sngi kaba kyrpang”.
Kumta, na ka liang kitei ki kynhun ki la pynpaw ka jingtyrwa sha ka sorkar ba kan sngewbha ban sngew ban sngap jong kiba bun balang ba kin pynkynriah ïa katei ka sngi kaba hap ha ka Sngi U Blei.
