Shillong, Risaw 25
Hadien ba ka Sorkar Jylla ka la lah ban pynpoi um sha ki 4 lak tylli ki longïing lyngba ka skhim Jal Jeevan Mission (JJM) haduh mynta, ka thong mynta ka long ban pynpoi um sa sha ki longïing kumba 1 lak tylli hapoh u Nohprah mynta u snem.
Haba ïakren bad u Myntri ka tnat PHE, u Marcuise Marak, u la ïathuh ba ki don ki shnong ha kaba la ïaid shaid shaid ka jingpyntrei ban pynpoi um bad ka thong mynta ka long ban pynpoi um sha 1 lak tylli ki longïing ha kine ar bnai ban wan.
“Ngi sngewkmen ba mynta ngi la lah ban kot sha ka 4 lak tylli ki longïing kiba la ïoh um lyngba ka JJM, bad ngi kyrmen ba ngin kot 5 lak tylli ki longïing haduh u Nohprah 2023,” la ong u Marak.
U la ong ba ka State Level Scheme Sanctioning Committee (SLSSC) ka la dep ruh ban mynjur ïa ki shnong kiba dei ban pyntrei ïa ka skhim JJM bad ka thong ka long ba baroh ki shnong palat 6,000 tylli ki dei ban ïoh um ha u snem 2024, katkum ka thong ba la buh ban pyntreikam ïa ka skhim JJM.
Haduh u snem 2019, ki don tang 4,550 tylli ki kor um ba treikam ha ki ïing, hynrei mynta ki la don kumba 4 lak tylli ki longïing kiba ïoh kor um ha la ïing.
Ki don 6,415 tylli ki shnong ha Meghalaya kiba don ha ka thup ban ïoh jingmyntoi lyngba ka skhim JJM.
