Shillong, Risaw 25
Ka Sorkar Jylla ha ka jingpynbna ba la pynmih ha ka 25 tarik mynta u bnai ka la tyrwa ban pynbna ïa ar tylli ki jaka hapoh ka East Khasi Hills kum ki ‘Protection Site’ ne ki jaka ba la ïada kyrpang katkum ka Meghalaya Heritage Act, 2012.
Ïa kane ka jingpynbna jong ka Sorkar ban tyrwa ïa ar tylli ki jaka la pynmih da u Commissioner & Secretary jong ka tnat Arts & Culture u Bah Federick R Kharkongor.
Ki ar tylli ki jaka ba la pynbna ban tyrwa kum ki ‘Protection Site’ ki long ka Archaeological Site ha Myrkhan kaba hapoh ka Mylliem Block bad ka Megalith Monument (ki mawbynna) ha Rynghep, Nongkseh.
Shuh shuh haba pynmih ïa kane ka jingpynbna, ka sorkar ka la ai por ruh haduh 30 sngi, ba lada don kino kino kiba pyrshah kin pynpoi ïa ka jingujor pyrshah sha ka Sorkar hapoh kine ki sngi, kata naduh ba la pynmih ïa ka jingpynbna lym kumta yn ym pdiang satia.
