Shillong, Risaw
U Bah Banteidor Lyngdoh, MLA ka NPP na Mawkynrew konstitwensi u la ong ba mynshwa haba peit ïa ki phlim Khasi ki paidbah ki ju ïarkhie namar kim pat biang ban ringdur ne ban ak, hynrei mynta u la ïohi ba ki paidbah ki la sdang ban ai jingkyrshan namar ka la biang nadong-shadong.
Ïa kine ki kyntien u Bah Banteidor u la ai jingkren kum u kongsan haba pyllait paidbah ïa ka phlim ba lyngkot kaba ai kyrteng ‘Echoes of Adolescence’ kaba la dei trai da ka IS Production bad Khymdeit Film Production kaba la long ha Khasi National Dorbar Hall Mawkhar ha ka 23 tarik mynta u bnai.
Ha kane ka sngi la ïadonlang u Bah Isynei Hing, ki tyngshop ki puron bad ki nongshah khot sngewbha.
U Bah Banteidor u la ïathuh ba ka sorkar jylla hapoh ka jingïalam u Conrad K Sangma kum u Myntri Rangbah ka la pynkhreh mynta ban shna cinema ïa ki phlim Khasi.
U la ïathuh ha ki por mynshuwa lada peit ïa ki phlim Khasi ki ju ïa rkhie namar kim pat lah ban pynwandur bha, hynrei ha kine ki hynñiew snem ka la don ka jingkylla namar ki paidbah ki la sdang ban ai jingkyrshan naduh ba ka la biang ka rukom ringdur bad ban ak ruh.
U la ong ban pynïaid bha ïa ka kam shna phlim ka dei beit ka jingïarap na ki paidbah khamtam mynta haba baroh ki briew ki la pyndonkam ïa ka social media.
“Nga sngewthuh haba im ka ktien im ka jaidbynriew bad ka kam shna phlim ka dei kawei kaba pynneh pynsah ïa ka ktien Khasi bad ïa ka riti dustur” u la ong.
U la ïathuh ruh ba u ju wan bunsien ha ki prokram ki phlim Khasi namar u shem ba ki samla ki la kiew ha ka sap shad bad rwai.
