Shillong, Risaw 25
Ka Hynñiewtrep Youth Council (HYC) Nongthliew Circle ha ka Sngi Balang ka la dawa ba dei ban kyntiew kyrdan noh ïa ka Nongthliew Government Secondary School sha ka Higher Secondary.
Ïa kane ka jingdawa ka la ïoh ban pynsngew ha ka jingïakynduh ïa u Director jong ka Schools Education & Literacy (SEL) bad ha kaba la aiti ruh da ka dorkhas halor katei ka jingdawa.
Haba kren sha ki lad pathai khubor, u President ka HYC Nongthliew Circle Bah Joplang Kharnaior, u la ong ba ka seng ka la buddien bha ïa kane ka jingdawa na ka por sha ka por bad ka long ruh ka mat kaba la slem naduh ba ka Sorkar Jylla ka la tyrwa naduh u snem 2019 ban kyntiew kyrdan ïa kane ka skul.
“Ka thaiñ Nongthliew ka donkam bha ïa ka shlem pule kaba bha bad ba bit ba biang. Ïa kane ka skul la seng naduh u snem 1956 bad kane ka skul ka la ai jingshakri mynta palat 50 snem, kumjuh ruh kiba bun ki khun samla jong ka thaiñ ki la ïoh jingnang jingstad lyngba ka jingdon jong kane ka skul,” u la ong.
Katkum ka dorkhas, ka seng ka la pynpaw ba ha ka thaiñ Nongthliew, ki don 18 tylli ki shnong bad kam pat don wat tang kawei ruh ka Higher Secondary lait noh tang kawei ka skul shimet.
“Ki paidbah ha ka thaiñ Nongthliew ki dei kiba im da ka rep ka riang bad kiba kham duna ka ïoh ka kot. Namarkata, ka jingdon jong ka Higher Secondary School ba la pynïaid da ka Sorkar kan long ka jingkyrkhu ïa ki longïing longsem,” u la ong bad bynrap, “Ngi kyrmen ruh ba ka Sorkar kan pynurlong noh kham kloi ïa kane ka jingthmu na ka bynta ka jingbit jingbiang jong ki khynnah skul ha ka thaiñ Nongthliew.”
