Nongstoiñ, Risaw 25
Ha ka Sngi Balang jong ka taïew, ki paidbah nongshong shnong ki la lap ïa kawei ka metïap na kawei na ki jaka kaba don ha wah Nonbah ïa kaba ym pat tip kyrteng ne lah ban ithuh.
Ka khubor na ki heh pulit ka West Khasi Hills District, la ïathuh ba na ka liang ki pulit ki la ïoh ïa kane ka jingtip na u Sordar ka shnong New Nongstoiñ halor ka jingdon jong kawei ka metïap jong uwei u briew kaba la thiah lyngktar ha wah Nonbah.
Shuh shuh la ong ruh ba na ka liang ki pulit ka thanat Nongstoiñ hadien ba ïoh jingtip ki la hiar mar mar sha katei ka jaka ha kaba ki la lap ïa ka metïap kaba la pyut na katei ka wah.
Na ka liang ki pulit ki la ong ruh ba la pyndep ïa ki jingdonkam baroh kiba long katkum ka aiñ bad la pynkit noh ïa katei ka metïap sha ka jaka buh metïap kaba don ha Nongstoiñ Civil Hospital na ka bynta ban leh ïa ka post mortem. Haduh ba thoh ïa kane ka khubor ym pat don kiba wan kam ïa kane ka metïap.
Kumta, ki pulit ki la kyrpad ïa ki bahaïing hasem ba kin wan ban khmih bad shimti ïa katei ka metïap na ka jaka buh metïap kaba don ha Civil Hospital, Nongstoiñ.
