Shillong, Risaw 25
Ha kawei ka jingjia kaba la jia ha ka miet jong ka 24 tarik mynta u bnai ha kaba uwei u rangbah ba la tip kyrteng kum u Lahdor Khongngai, 40 snem ka rta na ka shnong Wahlong kaba don sharum jong ka Sohra u la mynsaw jur haduh ba um tipbriew shuh hadien ba u la shah tied da u tyrnem ha ki katto katne ngut ki briew.
La ïathuh ba hadien katei ka jingjia, la pynkit noh ïa u Bah Lahdor sha Shillong Civil Hospital ha katei kajuh ka miet.
Na ka liang u Bah Lahdor uba don mynta hapdeng ka jingtipbriew u la ïathuh ba katei ka jingjia ka la jia ha ka miet jong ka 24 tarik mynta u bnai ha kaba ki la don katto katne ngut ki briew kiba la suba ba ki la ïa buaid, ki la kren da ki ktien sih ktien sang. Kumta ka la pynlong ïa ka lok jong u ban pyrta ba kin ym kren sih bad na ka liang ka lok jong u ka la phone sha u Rangbah Shnong ban ïathuh halor kane.
Hadien kumba katto katne por eiei, kitei ki briew kiba la buh shun lypa ïa u Bah Lahdor ki la phah mih ïa u shabar bad ynda u la mih shabar ki la bom ïa u da u tyrnem.
Shuh shuh u Bah Lahdor u la ïathuh ba hadien ba shah bom da u tyrnem u la kyllon ha madan. Nalor nangta u la ïathuh ba um don daw eiei bad kitei ki briew, hynrei kaba la pynlong ïa ki ba kin tied ïa u da u tyrnem ka dei tang namar ba ki dom ïa ka lok jong u kaba la tim bad ong ïa ki ban ym ïakren sih.
Ha kaba ïadei bad kane ka jingjia, na ka liang kii pulit ka Sohra Police Station ki dang pynlong ka jingtohkit kaba bniah ban lap ïa ka jingshisha halor kane ka jingjia.
