Shillong, Risaw 25
U Vice-Chancellor ka North Eastern Hill University (NEHU), u Prof. Prabha Shankar Shukla u la khot ïa ka jingïalang ba kyrkieh jong ka Academic Council (AC) ha ka Sngi Palei ha ka por 10 baje mynstep.
Katkum ka shithi sha baroh ki dkhot jong ka AC, katei ka jingïalang kan long ha Multi-Use Convention Hall, NEHU, Permanent Campus, Shillong “ban pynbeit ïa ka mat ba ïadei bad ka Four Year Under Graduate (FYUG) Programme hapoh jong ka National Education Policy 2020 (NEP-2020).”
Ha kawei ka liang, ka Joint Action Committee (JAC) jong ka NEHU Teachers’ Association (NEHUTA) bad NEHU Non-Teaching Staff Association (NEHUNSA), ka la ong ba ka jingai por ban weng ïa u Rohit Prasad haduh ka shiteng synñia jong ka 26 tarik, Risaw kan dang ïai neh bad ka jingïalang ka JAC ha ka Sngi Thohdieng kan ïaid beit kumba la pynbeit naba ki don ïa kiwei-kiwei ki mat ba kynthup ïa ka jingdawa weng ïa u.
“Ka JAC kan bteng ïa ka jingïakhih haduh ba ngin da kynjoh ïa ka thong,” ong ka NEHUTA bad NEHUNSA ha ka kyrwoh khubor.
Kumban shu kdew, ka JAC ha ka 19 tarik Risaw ka la dawa ban khot ïa ka jingïalang ba kyrkieh jong ka AC (NEHU) ban ïakren halor ka jingbym ïahap ka jingpyntreikam ïa ka NEP-2020 ha ka kyrdan pule UG ha ki kolej ba pynïasoh bad ka NEHU khlem ka jingmynjur jong ka AC katkum ka kyndon RA-5, Clause 13, hapoh ka Clause (1) (a) bad (2) jong ka Statute 42.
Ha ka 19 tarik Risaw, ka JAC ka la dawa ruh na u VC ban pyndam ïa ka kontrak jong u Rohit Prasad, kum u Technical Officer Senior Consultant.
Ka JAC kaba kynthup ïa ka NEHUTA bad NEHUNSA ka la ong ba la thung ïa u Prasad ha ka rukom bym ïahap kum u Technical Officer/Senior Consultant khlem kano-kano ka jingpynbna ne jingpynïaid katkum ka rukom thungkam – hynrei shimet khlem ka jingmynjur jong kiwei pat bad la pynlong ïa ka ‘interview’ (online) da u Vice Chancellor.
Ka komiti ka la dawa ruh ban weng ïa u hapoh shi taïew.
Katkum ka jingkdew jong ka JAC ha ka shithi sha u VC ha ka 19 tarik Risaw, ka ong ba ka skulbah ka la don lypa ïa kiba pyntbit ha ka liang ka Technology ïa kaba utei u briew u la shah thung.
“Ïa kine lah ban pyndonkam da kaba suk ban pyndep ïa ki kam ïa kaba la thung ïa u Rohit Prasad. Ha ryngkat ka tulop kaba heh lem bad ka DA (Dearness Allowance), ha kaba ki Consultant kim don hok, kata ruh na ka Recurring Fund jong ka skulbah, ka la pynlyngngoh haba ka skulbah da lade ka don hapdeng ka jingkyrduh pisa,” ong ka JAC ha ka shithi sha u VC.
Ka JAC ka la ong ruh ba ïa kane lah ban sakhi kum ka jingpynkheiñ ïa ki kyndon jong ka skulbah na bynta ka jingthung kam bad la pynkynmaw ruh ïa u VC ba ka skulbah kam dei ka shlem jingpule shimet ha kaba lah ban wanrah ïano-ïano, thung bad siew na pla tyngka ka Sorkar khlem da bud ryntih ïa ka rukom treikam.
“Kum kiba don ka jingsngewkhia ïa ka skulbah, sa shisien, katkum ki jingpynshai haneng, ngi dawa ba dei ban weng ïa u Rohit Prasad bad ruh ba un mih noh na ka jaka sah ba la mang hapoh hi taïew na ka tarik ba ïoh pdiang ïa kane ka shithi, lym kumta ka JAC kan sa shim ïa ka sienjam nangne shakhmat. Ngi khmih lynti ba kiba kum kine ki jingthung kam ba be-aiñ kim dei ban jia shuh hadien-habud,” ong ka JAC.
Kyrshan pura ka MeTTA ïa ka JAC-NEHU
Ha kawei ka liang, ka Meghalaya Tribal Teachers’ Association (MeTTA), NEHU lyngba ka kyrwoh na u President, Prof. D.R.L. Nonglait, ha ka jingïalang ba kyrkieh jong ka GB da kawei ka sur ka la rai ban kner ïa ka jingkyrshan ba pura sha ka JAC-NEHU khnang ban ïada ïa ki dawdah bad ki jingsngewkhia, ban khang lad na ki jingpynkheiñ bad ka jingpyndonkam bakla ïa ka bor da u VC. Ka jingïalang ka la rai ruh ban pan jingshai na ka ophis u VC haba ïadei bad ka jingjied bad jingthung kam ïa ki nonghikai na bynta ki kam bapher-bapher, kum Assistant Professor, Associate Professor bad Professor.
