Shillong, Risaw 25
Ka tnat pulit ka Jylla ka la ïoh ban ïakren bad ka tnat pulit ka Mumbai halor ka jingïoh pyllait im ïa 9 ngut ki kynthei ba kynthup ïa kawei na Meghalaya na Andheri, Mumbai ha ka Lah Sngi U Blei.
“Ngi la ïoh ban ïakren bad ki pulit ka Mumbai. Ki 9 ngut ki kynthei kiba la ïoh pyllait im ki don ha ka ‘Shelter Home’,” la ong u SP (City), Bah Vivek Syiem.
U la ïathuh ruh ba ka jingtohkit haba ïadei bad katei ka kam ka dang ïaid shakhmat bad na ka liang ki pulit (ka Jylla) ki la tyrwa ïa ka jingïarap ïoh lehse ka don kano-kano ka jingïadei hapoh ka Jylla.
Kum ban shu kdew hangne, kawei ka kynthei na Meghalaya ka long kawei napdeng ki 9 ngut kiba la ïoh pyllait im da ki pulit ka Mumbai ha ka jingkhynra ha ka thaiñ Andheri, Mumbai ha ka Lah Sngi U Blei.
Napdeng kitei ki 9 ngut kiba la ïoh pyllait im ha katei ka jingkhynra, 7 ngut ki dei na ka Thaiñ Shatei Lam Mihngi.
Katkum ki khubor, ki pulit hadien ka jingïoh jingtip, ki la khynra ïa ka jaka khem met ne ka ‘Spa’ kaba ha ka thaiñ Andheri bad pynpulom ïa ka jingtreikam jong ki kam khaïi met kaba heh bha.
Ha katei ka jingkhynra, ki pulit ki la ïoh ban pyllait im ïa 9 ngut ki kynthei na katei ka jaka ba kynthup ïa 4 ngut na Manipur, 2 na Mizoram, 1 na Meghalaya, 1 na Kolkata bad 1 na Lucknow.
Na ka liang ki pulit ki la kem ruh ïa u Manager jong katei ka jaka khem met ba la ithuh kum u Chandrakant. Hynrei ïa u trai jong katei ka jaka khem met ba la tip kyrteng kum u Atul Dhivar u don hapdeng ka jingphet rieh. Ki khubor ki ïathuh ruh ba la suba ïa ka jingdonkti jong bun ngut ki heh bad ‘riewpawkhmat ka nongbah Mumbai ha katei ka kam.
