Shillong, Risaw 25
Ha kane ka jingleh-niam Durga Puja kaba dang shu kut shen, na ka liang ki pulit jong ka East Khasi Hills ha ka jing -khynra kaba la pynlong ha kylleng ka nongbah Shillong, ki la ïoh ban kurup bun bah ka kyiad phareng bad kyiad pyrsi kiba la pynïaid beaiñ.
Ha ka kyrwoh khubor ba la pyllait da u Superintendent of Police (City), East Khasi Hills, Bah Vivek Syiem u la ong ha kane ka jingkhynra ba la pynlong la ïoh ban kurup palat shi lak ml ka kyiad IMFL, haduh 260 liter ka kyiad pyrsi bad kumba 15,000 ml ka beer.
U Bah Vivek Syiem u la pyntip ba ïa kane ka jingkhynra la pynlong kum shi bynta ban khmih bad peit bniah ba kin nym don kino-kino ki jingjia ki bym sngewtynnad, ka jingshngaiñ ïa ka ïaid ka ïeng jong ki paidbah.
Nalor kata, u la ïathuh ba ïa kine ki kyiad la ïoh ban kurup na kylleng ki jaka jong ka nongbah Shillong, kata na ka thaiñ Paltan Bazar, Jeep Stand, Mawblei, Khlieh Ïew, Basa Doh, Mawlonghat, Urkaliar, Ïew Laitumkhrah, Mawbah, Jhalupara bad Ïew Polo.
