Shillong, Risaw 25
U President ka VPP North Shillong konstitwensi, Bah Strong Kharjana u la pan tiket na Jaïaw konstitwensi ban ïakhun ïa ka ilekshon MDC ha u snem 2024, katba u Secretary ka VPP North Shillong konstitwensi Bah Elias Susngi u la pan tiket na Mawkhar-Pynthorumkhrah konstitwensi.
Kum ban shu pyntip, u Bah Strong Kharjana u dei u President bad u Bah Elias Susngi u dei u Secretary ka VPP North Shillong konstitwensi. Ki dei ruh kiba trei shit rhem ban pynïoh jingjop biang ïa u Bah Adelbert Nongrum ha ka ilekshon MLA ba dang shu dep.
Haba ka ilekshon MDC kan wan ha u snem 2024, kine ar ngut ki la mih pyrthei ban pan tiket na kitei ki kosntitwensi.
Haba phai ha Jaïaw konstitwensi ki don saw ngut kiba pan tiket na ka VPP kynthup ïa u Bah Strong Kharjana, katba ha Pynthorumkhrah-Mawkhar konstitwensi ki don kumba saw ngut eiei kynthup ïa u Bah Elias Susngi.
Kat haduh mynta ka kyrteng jong kine kiba pan tiket ka dang don ha ka miej jong ka Election Committee ka ban sa shim ïa ka rai ha kine ki bnai ban wan kum ki kyrtong ka VPP na kitei konstitwensi.
Ka jingkyrmen ban jop ka seng VPP ha kane ka ilekshon MDC kaba thep vote tang ki Khasi ka dei namar ha ka ilekshon MLA kaba ïa thep vote lang bad kiwei ki jaidbynriew, ki paidbah ki la jied ïa u Bah Adelbert Nongrum kum u kyrtong na ka VPP.
Ka jingïakhun kaba kham itynnad ka dei ha Jaïaw namar ka UDP katkum ki jingtip ba tikna kan pynïeng da u General Secretary barim ka KSU, Bah Auguster Jyrwa uba la ïoh jingkyrshan lang na u Bah Paul Lyngdoh uba dei u MLA ka West Shillong konstitwensi uba bat mynta kum u Myntri ha ka sorkar jylla, katba ïa u kyrtong ka VPP u ban sa pynbna hadien yn sa kyrshan da u Bah Adelbert Nongrum, MLA ka North Shillong konstitwensi.
