Nongstoiñ, Risaw 25
Ka jingleit khang tala jong ka Federation of Khasi Jaiñtia & Garo People (FKJGP) West Khasi Hills ïa ka kor tylliat maw jong ka kompeni shna surok Nongstoiñ-Wahkaji ha kine ki khyndiat sngi ba la dep ka la pynkhih phaloh ïa kiba bun ki paidbah bad ki nongïalam shnong kiba katei ka surok ka ïaid lyngba.
Kane ka la paw ha ka 25 tarik mynta u bnai ba namar ka jingkhih kaba jur jong ki paidbah kiba angnud ba ka jingpyntrei ïa ka surok ka dei ban ïaid shakhmat, ka Joint Action Committee (JAC) Lai Lyngdoh bad Warsanlyngdoh Area ka la mih shakhmat ban ïakren ïa katei ka kam da kaba ki la pynlong ruh ïa ka jingïalang ban ïakren bad ïatai sani bad ka FKJGP halor katei ka kam.
Ha katei ka jingïalang la ïashim bynta da ki nongïalam ka JAC, ki nongïalam ka FKJGP West Khasi Hills, ki briew na ka kompeni kaba pyntrei ïa katei ka surok kumjuh ruh na ka liang ki nongïalam ka WKSU Sengkmie bad ki nongïalam ka UHM Nongstoiñ Circle kiba la ai ka jingkyrshan ïa katei ka jingkhang tala jong ka FKJGP.
U Bah Carry Kharmutee, Vice President ka FKJGP West Khasi Hills ha ka jingdonlang kitei ki seng haba kren bad ki lad pathai khubor hadien ka jingïalang u la ong, ka jingïalang kaba la ïatai sani da kawei ka jingmut, na ka bynta ka bha ka miat jong u paidbah la ailad ïa katei ka kompeni ba ïa mynta kan plie noh ïa ka tala kaba la khang ïa ka kor tylliat maw, hynrei la ïa mynjur ban ai por biang ïa ka kompeni ba hapoh shi bnai ka dei ban shim khia ban pynbiang ïa ki kot ki sla ba pura.
U la ong ruh ba la ïa kut ba lada hapoh shi bnai na ka liang ka kompeni kam pat lah ban pyni dak eiei, ka FKJGP, JAC kumjuh ka WKSU bad UHM kin sa shim pat da kiwei ki lynti ban leh tangba kan ym ktah pat ïa ka roi ka par khamtam ïa ka kam shna surok.
Shuh shuh u Bah Carry u la ong ruh ba ka FKJGP ka kwah ban pynshai sha ki paidbah halor ka jingleit khang tala kynsan jong ka, kaba pynlyngngoh ïa ki paidbah, ka la pynlong ïa ka FKJGP ban bitar halor ka jingthok jong katei ka kompeni da kaba ai daw ba ki kot ki sla ki don hangne ki don hangtai bad ynda la leit mih ki ong ki don sha Shillong bad ki la pan bor biang. Kumta ka FKJGP ruh ka la ailad, hynrei ynda la ïa ap ïa kaei kaba ki la ong, na ka liang ka kompeni kam ai jubab bad kumta hapdeng ka jingbitar ka FKJGP kam banse shuh ban shu khang tala.
Katba u Bah Zandy Myrthong, General Secretary ka JAC u la ong ba ka JAC ka dei ka kynhun kaba mih khnang ban kyrshan ïa kane ka surok ka ban pyntrei naduh na Nongstoiñ-Wahkaji naduh ba sdang. Hynrei ha kaba ïadei bad kane ka mat, ka long hadien ba ka JAC ka la ïohi halor ka jingkhang tala ïa ka kor tylliat maw bad na ka liang ka JAC kaba thrang ïa kane ka surok ka dap da ka jingkyndit bad sngewbitar bad hadien kane ka la don ka jingïakren kumno ban leh hynrei ka jingïakren ka long ban ïakynduh ïa ka FKJGP ban kyrpad ba kan pyrkhat na ka bynta ka jingdonkam u paidbah.
Shuh shuh u la ong ba ka JAC ka la thoh ruh da ka jingthoh sha ka FKJGP ba kan sngewbha ban sngewlem ïa ka jingdonkam u paidbah. Namar kata, ka JAC ruh ka sngewkmen ïa ka jingpyrkhat jong ka FKJGP ban khot ïakren sngewthuh jingmut.
