San Francisco, Risaw 25 (UNI)
U Attorney General ka California, USA, u Ron Bonta, ha ka Sngi Ba-ar u la ïalam ïa ka kynhun ki 33 ngut ki Attorney General jong ki jylla bapher-bapher ka Ri America, ban ai da ka jingmudui mukotduma ïa ki rynsan jong ka kompani Meta bad ki kynhun ba ïatreilang bad ka, da kaba kynnoh ba kane ka kompani ka la buh ïa ki katto katne ki bynta ha Instagram bad Facebook kiba pynkylla ïa ki khynnah bad samla lud ban long kiba kyrni ha ka jingpyndonkam ïa kine ki rynsan kaba la ktah pat ïa ka bor pyrkhat bad ka bor met jong ki.
Ïa kane ka jingmudui la ujor ha ka District Court ka Northern District jong ka California. Ki Attor-ney General ki la dawa ba dei ban buh da ki jingpyrkhing/jingmana bad ban buh da ka kuna khnang ban teh lakam ïa ki jingleh jong ka Meta, la ong u Bonta ha u kyrwoh khubor.
Kum shi bynta na kane ka jingïakhun, phra ngut ki Attorney General ki la pynbna ban ai jingmudui mukotduma ha ki ïingbishar ha ki jylla jong ki pyrshah ïa ka Meta.
Ka jingmudui ka long hadien ba la wan da ka jingtohkit ha kylleng ka Ri kaba u Bonta u la pynbna ha ka 18 tarik Naiwieng, 2021.
“Ka jingtohkit ka la poi sha ka jingrai ba ka Meta ka la ktah ïa ki khynnah bad ki samla lud, wanrah ïa ka jinglong kyrni ha ki khynnah bad samla lud tang ban ïoh kamai,” la ong u Bonta.
Ha ki jingmudui, la kynnoh ba ka Meta ka la pynkheiñ ïa ki aiñ ki kanun jong ka Sorkar Pdeng bad jong ki jylla.
Katkum ka jingmudui, la ong ba ka Meta ka la thaw ïa kata ka lad ban kamai pisa da kaba pyntikna ba ki khynnah bad samla kin pynlut bun bah ka por jong ki, jingbuh ïa ki lad ki lynti kiba ktah ïa ka jingmut jingpyrkhat bad ban ïalam bakla ïa ki paidbah halor ka jinglong jingshngaiñ jong kita ki bynta, bad ka jingpynmih ïa ki kaiphod kiba pyni bakla ba ka jingshah ktah na kine ka long kaba duna.
Watla ki la don ki sabut kiba pynïasoh ïa ki rynsan jong ka bad ka jingshah ktah ki khynnah bad samla lud, ka Meta ka la kyntait ban leh eiei halor kane bad ka bteng ban buhrieh bad pynrit ïa ki jingktah jur ki rynsan ka Meta, la ong u Bonta.
Ki 33 tylli ki jylla kiba la ïasoh ban ai mukotduma pyrshah ïa ka Meta ki kynthup ïa ka Arizona, California, Colorado, Connecticut, Delaware, Georgia, Hawaii, Idaho, bad Illinois.
Ka jylla Florida kan ai la ka jong ka jingmudui ha ka US District Court jong ka Middle District ka Florida.
Ka District of Columbia, Massachusetts, Mississippi, New Hampshire, Oklahoma, Tennessee, Utah, bad Vermont ki la ai la ki jong ki jingmudui ha ki ïingbishar ki jylla jong ki.
