Shillong, Risaw 26
Ka Jylla ka la jan kot sha ka 22 lak ngut ki nongthep ‘vote’ haduh mynta, bad ha kine ki 8 bnai hadien ka ilekshon MLA, ka jingdon ki nongthep vote ka la kiew da 7,067 ngut.
Kane ka long katkum ka thup kyrteng ki nongthep ‘vote’ kaba dang shu pynmih hashwa ban shon ïa ka thup kyrteng kaba pura kaba dei ban pynmih ha ka 5 tarik Kyllalyngkot, 2024.
Haba kren sha ki lad pathai khubor ha ka Sngi Palei, u Chief Electoral Officer (CEO), u BDR Tiwari, u la ong ba haduh mynta, ka Jylla ka don 21,86,151 ngut ki nongthep ‘vote’ baroh, kiba kynthup ïa 10,81,006 ngut ki shynrang bad 11,05,142 ngut ki kynthei.
Ha ka ilekshon MLA kaba la long ha u bnai Rymphang bad Lber mynta u snem 2023, baroh ki nongthep ‘vote’ ha Meghalaya ki don 21,79,084 ngut; kita ki long 10,79,984 ngut ki shynrang bad 10,99,098 ngut ki kynthei.
Ïa kane ka thup kyrteng ki nongthep ‘vote’ kaba kyrpang na bynta u snem 2024 yn sa pynmih ha ka 5 tarik Kyllalyngkot 2024.
Ka por ban phah ki jingpyrshah ïa ki kyrteng ki nongthep ‘vote’ ka dei naduh ka 27 tarik Risaw haduh 9 tarik Nohprah, bad ka jingshon ïa ka thup kyrteng kaba la kyntiew thymmai ïa ki nongthep ‘vote’ ka dei ha ka 1 tarik Kyllalyngkot, 2024.
Ka jingweng ïa ki jingujor bad kino-kino ki jingpynksan ka dei ha ka 26 tarik Nohprah.
