Shillong, Risaw 26
Namar ka jingmih jong ki jingpyrshah ïa ka sngi pynkut ïa ka tamasa ‘Cherry Blossom’ kaba dei ha ka Sngi U Blei, ka Sorkar Jylla ka la bthah ïa ki nongpynïaid ïa kane ka tamasa ba ki dei ban sdang hadien jong ka 3 baje janmiet, kata ha ka sngi ba pynkut ïa ka.
Haba ïakren bad ki lad pathai khubor ha ka Sngi Palei, u Symbud Myntri Rangbah ka Jylla Bah Prestone Tynsong u la ïathuh ba ka Sorkar ka la dep ban bthah ïa ki nongpynïaid jong katei ka tamasa ba kin pynsdang ïa ka tamasa hadien ka 3 baje ha ka sngi kut kaba dei ka Sngi U Blei.
“Lada phi ïakren halor ka Sngi U Blei lane Sngi Saitjaiñ ne Sngi Thohdieng, don ki por ba ka Sngi pynkut/khatduh ka jia ha ka Sngi U Blei lane lehse ka sdang ha ka Sngi U Blei ne Sngi Saitaiñ ne Sngi Thohdieng. Ki paidbah ka Jylla ki dei ban sngewthuh ba kane kam dei kaba ngi kwah ban leh ha ka Sngi U Blei hynrei kane ka tamasa ka dei kaba lai-saw sngi bad kumta ka jia ryngkhat ba ka kut ha ka Sngi U Blei,” u la ong.
“Namar ba kane ka tamasa ha kane ka kynti kan kut ha ka Sngi U Blei, kumta ngi la shim ka rai bad dep ban bthah ïa ki nongpynïaid ïa ka tamasa ba kin sdang ïa ka tamasa hadien ka 3 baje janmiet jong ka Sngi U Blei, kata hadien ba kut ki Jingïaseng,” la pyntip u Symbud Myntri Rangbah.
Ha kajuh ka por u Symbud Myntri Rangbah u la ai ruh ka jingkular ba ïa kane ka tamasa yn nym buh shuh ha ka Sngi U Blei ha u snem ban wan.
“Nga buh ka jingkyrpad sha baroh ban long kiba jai-jai bad ngin sa ïapeit pat naduh u snem ban wan kumno ban kheiñ ïa ki sngi khnang ba baroh kin ïakmen lang bad baroh kin ïoh jingmyntoi na kane ka tamasa”.
