Shillong, Risaw 26
Ki pulit ka nongbah Shillong ha ka Sngi Palei ki la ïoh ban kem noh ïa saw ngut ki briew katba ki dang sam ïa ki shithi dawa pisa sha kawei na ki dukan kaba don ha Khyndailad.
Kane ka jingïoh kem ïa kitei saw ngut ka la long hadien ba ki pulit ki la ïoh jingtip ba ki don ki briew kiba ju leit ban dawa pisa na ki dukan ha ka Khyndailad bad Ïewduh. Halor kane, ka pulit ka Special Cell jong ka East Khasi Hills ki la pynlong ka jingpynapshrip la bun sngi ha katei jaka bad dei ha katei ka sngi ba la ïoh ban kem noh ïa kitei 4 ngut na Khyndailad (Police Bazaar) katba ki dang sam shithi dawa pisa sha kawei ka dukan.
Ka jingïoh kem ïa kine ki briew, ka la pynpaw pyrthei ruh ïa ka kyrteng jong ki hynriew tylli ki seng ki bym pat ju bna satia ka kyrteng hapoh ka jylla ïa kaba la pyndonkam da kine ki briew ban dawa pisa.
Kine hynriew tylli ki seng ki dei ba la tip kyrteng kum ka Hynñiewtrep People Defence Alliance (HPDA), ka United Khasi Movement (UKM), ka Federation of Khasi United People (FKUP), ka Confederation of Meghalaya People (CMP), ka Khun Hynñiewtrep Youth Council (KHYC) bad ka Hynñiewtrep Youth Region (HYR).
Ha ka kyrwoh khubor ba la phah da u Superintendent of Police (City) ka East Khasi Hills u Bah Vivek Syiem u la ong, ha kaba ïadei bad kane, ki pulit ki la pynrung da ka Suo-Moto case pyrshah ïa kine 4 ngut ki briew ha thanat Sadar halor ki kam dawa pisa.
U la ïathuh ruh ba na kine ki briew, ki pulit ki la ïoh ban kurup kawei ka scooty kaba don ïa u nombor ML05-Q-9828, saw tylli ki mobile phone lem bad ki shithi dawa pisa jubor kata lai tylli ki shithi dawa pisa bad lai tylli ki receipt book na ka seng HPDA, ar tylli ki donation receipt slip jong ka UKM, ar tylli ki donation receipt slip jong ka FKUP, ar tylli ki donation receipt slip jong ka CMP, kawei ka counterfoil slip jong ka KHYC bad ar tylli ki donation receipt slip ka HYR.
U Bah Vivek u la ong ba ka jingtohkit ka dang ïaid shakhmat ban pynthikna ïa ki dukan kiba la dep sam ïa ki shithi dawa pisa khnang ban lah pynrung kyrteng kham bun ki case pyrshah ïa kine ki runar bad ruh ban kem ïa kiwei kiba donkti ha kane ka kam dawa pisa jubor hapoh ka nongbah.
U la ong ruh ba napdeng kine kiba la shah kem, ki don katto-katne kiba la don dak sniew bad kiba la ju shah kem teng.
Namar kata, u la ong ba ka tnat pulit ka buh ka jingkyntu ïa ki paidbah bad ki nongkhaïi ba kin ai jingtip sha ki pulit khnang ba kin lah ban kem ïa kum kine ki briew bad ban pynngat ha ki kyndon aiñ.
