New Delhi, Risaw 26 (UNI)
Ka sorkar India ha ka Sngi Palei ka la pynpaw ïa ka jingkyndit kaba khraw halor ka rai jong kawei ka ïingbishar ha Qatar pyrshah ïa ki 8 ngut ki shipai duriaw barim ka Ri kiba trei ha ka kompani Al Dahra ha kaba ka jingpynsaja pyrshah ïa ki ka long ban shu pynïap.
Ka “Court of First Instance” ka Qatar ka la ai ïa katei ka rai pynïap halor ki jingkynnoh kiba khlem pyntip paidbah satia.
Ha u kyrwoh, ka tnat bar ri jong ka Sorkar India ka la ong, “Ngi sngewkyndit shikatdei halor ka rai ban pynïap bad ngi dang ap ïa ka jingtip kaba bniah halor kane. Ngi la ïakren bad ki bahaïing hasem bad ki muktiar jong kitei ki 8 ngut, bad ngi dang wad ruh ïa ki lad ki lynti na ka liang ka aiñ ban ïakhun ïa kane.”
Nalorkata, ka tnat bar ri ka la ong ba kan ïai bteng ban ai jingïarap ha ki liang bapher-bapher ïa kitei ki 8 ngut bad kan ïakren ruh halor katei ka rai bad ki bor ba dei khmih ka Qatar.
Kitei 8 ngut ki nong India ki la shah kem ha Qatar ha ka 30 tarik Nailar jong u snem ba la dep.
“Namar ka jingbym lah ban ïathuh halor kiei-kiei kiba ïadei bad kane ka mukotduma, kan ym long satia kaba biang ban kren than halor kane,” la ong ka tnat bar ri.
Kitei 8 ngut ki dei kiba trei bad ka kompani ba la ai kyrteng “Al Dahra Global Technologies and Consultancy Services” kaba dei ka kompani shimet kaba ai jinghikai sha ki shipai bad bor pahara ka Qatar.
Ïa ki jingkyrpad jong kitei 8 ngut ban ai jamin ïa ki la kyntait la bunsien bad ïa ka jingset patok ïa ki la bteng na ka por sha ka por da ki bor ba dei khmih ka Qatar.
