Shillong, Risaw 26
Ki nongïalam ba hakhmat ka Jaiñtia National Council (JNC) ha ka Sngi Palei ki la pyntip ba kin leit sha Delhi ban kyrshan ïa ka seng HANM halor ka jingdawa ban pyntreikam noh ïa ka Inner-Line Permit (ILP) ha Meghalaya.
“Kum ban shu pynkynmaw ba na ka por sha ka por ka JNC bad ka HANM ki ju ïatreilang bha ha kaba ïadei bad ki mat ki jura kiba ktah ïa ka Ri bad ka jaitbynriew ka Bri u Hynñiewtrep. Ban shu phai dien ha ki snem ba la dep ruh ka JNC bad ka HANM ki la ju ïadon lang bha ha ki shnat bapher bapher kum ka Confederation of Meghalaya Social Organization (COMSO) ha kaba ka mat kaba hakhmat duh ka dei ka ILP bad la pynlong ruh ïa ki jingïakhih ha kylleng ki jaka jong ka Bri u Hynñiewtrep. Kum ha Rilum Jaiñtia, ka JNC ka la pynlong jingïakhih ha kiba bun ki jaka ban dawa na ka Sorkar Pdeng ba ka dei ban pyntreikam noh mardor ïa ka ILP namar dei tang kane kaba long kum ka rishot bah ha ka ban ïada na ka jingpang kaba ma tam bad kata ka long ka jingrung kyrthep jong ki bar jylla ha ka Bri u Hynñiewtrep,” la ong u kyrwoh ba la phah da u Publicity Secretary ka JNC, u Bah Mebanteilang Sukhlaiñ.
U Bah Sukhlaiñ u la ong ba dei hadien ka jingïakhih kaba heh tam ba la pynlong da ka COMSO ha nongbah Shillong ha u snem 2019 kaba la pynlong ruh ïa ka sorkar jylla ban mynjur da ka rai hapoh ka Ïingdorbar Thawaiñ ban dawa na ka Sorkar India ban pyntreikam noh ïa ka ILP ha ka jylla.
Hadien kane ruh, ha u snem ba la dep, ka HANM bad ka JNC bad kiwei ki seng pawkhmat ki la ïoh ban thaw da kawei ka shnat bad kata ka dei ka Save Hynñiewtrep Mission ha kaba la buh ruh ïa ki khyndai tylli ki mat jingdawa ba dei ban pyntreikam noh mardor bad la pynlong ruh ïa ki jingïakhih bapher bapher ha kylleng ki jaka.
“Nalor kine ruh haba phai sha ki mat ki jura ba ktah ïa ka Rilum Khasi bad Jaiñtia, ka JNC bad ka HANM ki ju ïatreilang bha kum ka mat kaba ïadei bad u pud u sam,” la ong ka JNC.
Namarkata, ha kane ka kynti ruh, ka JNC ka la rai ban leit lang sha nongbah Delhi ban ai jingkyrshan ba pura ïa ka HANM ha ka 3 tarik Naiwieng ban pyni bad pynbor ïa ka Sorkar Pdeng ba la dei ka por ban ai noh ïa ka ILP ha Meghalaya.
“Lada ha Manipur ka Sorkar Pdeng ka lah, balei pat ha Meghalaya? Ngi dawa ïa la ka jong ka hok na ka bynta ban ïada bad pynneh pynsah ïa la ka khyndew ka shyiap ka riti ka dustur. Kan eh aïu ïa ka Sorkar Pdeng ban ai ïa ngi ïa kaba ngi dei hok ban ïoh,” la bynrap u Bah Sukhlaiñ.
