New Delhi, Risaw:
Ka high-level committee for social sciences, ba la thaw da ka National Council of Educational Research and Training (NCERT) ka la ai jingmynjur ban bujli noh da ka kyrteng Bharat ha ka jaka jong ka India ha baroh ki kot skul hapoh ka Ri.
Katkum ka jingïathuh jong u Chairman ka committee u C.I Issac, ki dkhot jong ka committee ki la ai jingmut ban bujli noh da ka kyrteng Bharat ha ka jaka jong ka India ha baroh ki kot skul bad ha kajuh ka por ban wanrah noh da ka ‘Classical History’ ha ka jaka jong ka ‘Ancient History’ ha ka jingpynbeit ïa ki bynta ba dei ban pule ha skul bad kumjuh ruh ban kynthup ïa ka Indian Knowledge System (IKS) ha baroh ki sobjek.
Kane ka rai jong ka committee ba la thaw da ka NCERT ka la mih ruh hapdeng ka jingïatai kaba dang jur halor ka jingthmu pynkylla kyrteng ïa ka India sha ka Bharat.
Katba na ka liang u Chairman jong ka NCERT u Dinesh Saklani, u la pynpaw ba haduh mynta ym pat shim satia ïa kano-kano ka rai halor ka jingai jingmut, jingtyrwa bad mynjur da katei ka committee ban bujli kyrteng noh da ka Bharat ha ka jaka jong ka India ha ki kot skul.
Ka kyrteng Bharat nyngkong eh ka la paw ha ka por ba ka sorkar ka la phah ïa ki jingkhot sngewbha sha ka G20 ha ka kyrteng jong ka ‘President of Bharat, ha ka jaka jong ka President ka India. Hadien kane, ka jingthoh ne ka jingbuh kyrteng jong u Myntri Rangbahduh ka Ri ha ka Summit ba la long ha New Delhi ruh la thoh “Bharat” ha ka jaka jong ka India.
Shuh shuh na ka liang jong u Isaac u la ong ba ka committee ka la ai jingmynjur ruh ban pynpaw ïa ka “Hindu Victories” ha ki jingleh thma bapher bapher ha ki kot pule skul.
“Ïa ki jingshah rem ki jong ngi, la pynpaw bad kdew ha ki kot skul hynrei ïa ki jingjop jong ngi pyrshah ïa ki Mughals bad Sultans ym shym la kdew,” la ong u Isaac, uba dei ruh u dkhot jong ka Indian Council of Historical Research (ICHR).
