Nongpoh, Risaw 27
U MLA ka Jirang konstitwensi, Bah Sosthenes Sohtun mynta ka sngi u la leit ban buh ïa u mawnongrim ban tei ïa ka Block Integrated Development Complex – BIDC (Assam Type) hapoh ka Group IX ha ka jinglut kaba la kot sha ka T. 2.77 klur ha Jirang C & RD Block, Patharkhmah.
Ha kane ka sngi la sakhi ruh ïa ka jingdonlang u Director ka tnad Community & Rural Development ka Jylla, u S.C. Sadhu, u MDC ka Jirang konstitwensi, u Bah Victor Rani, u SDO ka Patharkhmah Civil Sub-Division, Bah M.B. Tongper, u Project Director ka DRDA Ri-Bhoi, u Raja Brahma, u BDO ka Jirang C & RD Block, u Dr. P.R. Hajong nalor ki nongïalam shnong, ki longkmie bad ki ‘riew rangbah ka thaiñ.
Haba ai jingkren ha kane ka jingïalang, u Bah Sohtun u la pynpaw ïa ka jingsngewnguh sha ka Sorkar MDA hapoh ka jingïalam u Conrad K. Sangma kum u Myntri Rangbah kaba theh ïa ki kam pynroi na bynta ki paidbah ka Jirang konstitwensi hapoh kine ki 5 snem tam kiba la leit.
U la ong ruh ba ka dei ka jingsah kynmaw ba ka Jirang konstitwensi hapoh ka jingïalam ka Sorkar MDA ka ïoh ban pyntrei ïa kiba bun tam ki skhim pynroi haba ïanujor bad kiwei-kiwei ki konstitwensi da kaba ai khublei kyrpang ïa u Myntri Rangbah, u Conrad K. Sangma lem bad ka kynhun Myntri kaba la shim khia bad pynurlong ïa ki jingangnud jong ki paidbah.
Ha kaba ïadei bad ka BIDC ka ban sa tei bad pyndep noh shen, u Bah Sohtun u la pynpaw ïa ka jingkyrmen skhem ba kane ka jingtei kan ai jingmyntoi shi kat dei ïa ki paidbah ka konstitwensi ba kin ïoh ïa ki jingmyntoi kiba bun na ka Sorkar. U la kyntu ruh ïa ki ophisar, ki nongïalam shnong bad ki ‘riew paidbah kumjuh ba kin ai ka jingïatreilang na bynta ban pyndep kloi ïa kane ka jingtei ka ban long ka jingkyrkhu ïa ka thaiñ hi baroh kawei.
Ha kawei ka liang, u la pynpaw ka jingbynñiaw halor ka jingdon jong ki katto-katne ngut ki briew kiba pyrshang ban pynthut ïa ka jingpyntrei jong katei ka projek bad kyntu ïa ki nongialam shnong bad ki paidbah ba ki dei ban ai ïa ka jingïatrei ryngkat kaba khlaiñ khnang ban ym ailad ïa ki kynrum-kynram ba kin mih bad ba ka jingtei ïa katei ka projek kan dep ha ka por kaba biang bad kan long ka rynsan ïa ki paidbah ba kin ïoh ki jingmyntoi kiba bun kiba wan na ka liang ka Sorkar Jylla.
U Director ka tnad C & RD, u S.C. Sadhu ha ka jingkren u la ong ba ka jingtei ïa ka BIDC ka long shi bynta na ka jingthmu jong ka Sorkar ban kyntiew ïa ki kam pynroi ha ki jaka kyndong bad kumba ka Block & RD Block ka dei kawei na ki tnad Sorkar kaba ïadei bad u paidbah ban pyntrei ïa shibun ki kam pynroi.
Shuh shuh u la ïathuh ba lyngba ka jingdon jong ka ophis treikam kaba paka, kan ai mynsiem ïa u BDO, ki nongtrei kumjuh ba kin dang lah ban trei kham bha ïa ka kam bad ba kin ïatrei ryngkat bad kiwei ki tnad treikam jong ka Sorkar.
Ha kawei ka bynta, u Sadhu u la pyntip ba ka Sorkar Jylla mynta ka phaikhmat ban pyntrei ïa ki ïing baduk ha ka rukom kaba heh tam mynta u snem haba ïa nujor bad ki 5 lane 6 snem baroh kiba la dep bad kyntu ïa u BDO bad ki nongtrei jong ka Block baroh ba kin shimkhia ban pynurlong ïa kane ka jingthmu jong ka Sorkar khnang ba kan long kaba jop.
