Shillong, Risaw 27
U Myntri ka Sorkar Jylla u Bah Kyrmen Shylla u la ong ba um pyrshah ne pdiang ïa ka lynti rel ban wan sha Jaiñtia Hills bad u la bynrap ba ki paidbah ki donkam ban sngew-thuh shwa, kiei ki jingmyntoi bad jingduh lada wan ki projek.
U Bah Kyrmen u la pynpaw ïa kane haba kren shaphang ka jingtyrwa ban wan ka rel sha Jaiñtia Hills.
“Ngam pyrshah ne pdiang ïa ka rel namar ki kam pynroi ki dei kiba kongsan na ka bynta ki paidbah la ka rel ka bha ne ka sniew, ngim pat lah ban sngewthuh namar ngim pat mad. Kumta kum ki paidbah ngim dei ban shu bishar noh mar-mar. Nga kwah ba ki paidbah kin sngewthuh shwa ïa ka tynrai jong ka jingmyntoi bad jingduh jingmyntoi lada don ka rel lane kiwei pat ki projek,” la ong u Bah Kyrmen.
U la ong ruh ba kino-kino ki projek kin wan da ka jingsngewthuh bad jingmynjur ki paidbah, bad ma u ruh kum u nongmihkhmat un don bad ka rai jong ki paidbah namarba kano-kano ka projek kaba wan, kan ai jingmyntoi ïa ki paidbah bad lada kam long kumta ki paidbah kin shah ktah.
Haba kylli shaphang ka ilekshon MP bad ilekshon MDC, une u Myntri uba dei ruh u nongïalam ka UDP u la ong ba ka UDP ka ïoh 12 ngut ki MLA da ka jingkyrshan ki paidbah bad kin nym iehnoh la ka dei ha ka ilekshon MP lane MDC.
Halor ka VPP, u Bah Kyrmen u la ong ruh ba kino-kino ki seng saiñ pyrthei kin kam beit ha ka por ïakhun ba ki khlaiñ ne kin jop, hynrei haba kut, ka sur u paidbah ka dei kaba khatduh eh.
