Nongstoiñ, Risaw 27
Ïa ka Publication of Draft Electoral Roll ha kaba ka 01.01.2024 kaba dei ka tarik kaba khatduh jong ki lai tylli ki konstitwensi ka West Khasi Hills District kiba kynthup ïa ka 32-Nongstoiñ, 33-Rambrai Jyrngam bad 34-Mawshynrut la pyllait da u Bah H.K. Thabah MCS, ADC (Election) ka West Khasi Hills ha ka Sngi Thohdieng ha ka jingïalang kaba la long hapoh Conference Hall jong ka shlem treikam DC, Nongstoiñ.
Ha kane ka sngi la don lang ruh ki ERO, AERO, EAC (Election), ki nongmihkhmat jong ki seng saiñ pyrthei, ki nongthoh khubor bad kiwei-kiwei.
U Bah Thabah haba kren kum u kongsan u la ai ka jingïaroh ïa ka tnad Ilekshon halor ka jingtrei shitom ba khlem sangeh, ka jingaiti lut ban pynbit pynbiang ïa ka ‘Electoral Roll’.
U la ïathuh ba lada don kino-kino ki jingbakla, jah kyrteng ne ban kynriah na kawei ka konstitwensi sha kawei pat kan sdang naduh kane ka sngi ba la pyllait ïa ka ‘Draft Electoral Roll’ haduh ka 9 tarik u Nohprah, 2023; kaba dei ka tarik ba la pynbeit da ka Election Commission jong ka Ri India (ECI).
U la wer ruh ïa ka jingïatreilang bad jingkyrshan lang da baroh kiba don bynta kynthup ïa ki seng saiñ pyrthei khnang ban ïoh ïa ka ‘Electoral Roll’ kaba bit ba biang bad kaba hun.
U la pynkut ruh da kaba kyntu ïa baroh ki khynnah kynthei bad shynrang ban wan shakhmat ban pynrung kyrteng ïalade ha ka ‘Electoral Roll’ khamtam ïa kito ki ban sa ïoh bad ba la kynjoh 18 snem ka rta ha lane shwa ka 01.01.2024.
Ha kane ka sngi la ïoh ruh ban sam ïa ka ‘Draft Electoral Roll’ sha ki seng saiñ pyrthei da ki ADC (E) ha ka prokram ba la pynïaid bad pynwai da u Bah H.K. Thabah ADC (Election).
