Tura, Risaw 27
Ka jingbym tikna ïa ka jaka ban pynlong ïa ka tamasa 100 ksing ne ka ‘Wangala’ mynta u snem la dep pynbeit bad ki bor distrik ka West Garo Hills da kaba pynbna ba ïa kane ka tamasa ba man u snem yn pynlong naduh ka 9 haduh ka 11 tarik u Naiwieng ha kad liengsuiñ Baljek (ka bym pat pyntreikam).
Ka rai ban pynlong ïa katei ka tamasa ba man u snem ha katei ka jaka, la pynbna da u Deputy Commissioner ka West Garo Hills, u Jagadish Chelani hadien ka jingïalang kaba la long dang shen bad ki tnad treikam ba dei khmih, ka Wangala Committee lem bad kiwei-kiwei.
Katei ka sienjam ban pynkynriah ïa ka tamasa sha katei ka jaka ba shi por ka wan hadien ka jingngam jong ka jingkieng sha shiliang ka Wah Ganol, ha kawei ka liang kaba pynlong ïa ka jaka ba ju pynlong ïa ka tamasa – Wangala A’dam ban ngam katto-kante mitar shapoh um naduh ba sdang ïa ka Ganol Hydro Electric Project ha Chibragre.
