Jowai, Risaw 27
Ka Muster Roll Workers & Labour Union Central Executive Committee (MRW&LU-CEC) ha ka 27 tarik Risaw ka la pynlong ïa ka prokram ai jinghikai halor ka phang ‘Crime Against Women bad Drugs Abuse’ ha District Library Auditorium, Mynthong, Jowai.
Ïa ka jingïalang la pynïaid da u Bah A.R. Laloo Assistant General Secretary AJMRW&LU bad la ïoh ki kyntien lamkhmat na ka Kong D. Ïakai, President AJMRW&LU bad haba kut ka jingïalang la ïoh ki kyntien ai khublei na u D. Khonglah, Assistant General Secretary Education Unit.
Ïa kine ar tylli ki mat la wan ban batai pynshai da ki ‘riew shemphang kiba kynthup ïa ka Kong Lucy Ksoo, Centre Manager – One Stop Centre, Sabahmuswang bad ka Dr. J.N. Shullai, Director MCSWA ha ka jingdonlang ki nongtrei ‘Muster Roll’ na ki 2 tylli ki distrik jong ka Ri-lum Jaiñtia.
Ka Kong Lucy Ksoo kum ka ‘riew shemphang haba batai shaphang ki kam thombor pyrshah ïa ki kynthei, ka la ong ka jingshah thombor bad shah ban beiñ ki kynthei khynnah ka dang bteng bad nang kham jur shuh-shuh ha kine ki sngi kiba mynta.
Ka la batai bniah shaphang ki kam kiba har rukom pyrshah ïa ki kynthei la ka long ha ïing ha sem kum ka jingshah shoh shah dat, shah tim shah tla jong ka longkmie ha u lok kaba ka aiñ ka la pynap lypa ban pynngat ïa uno-uno uba donkti ha katei ka bynta da ka aiñ ba kyrpang, kaba la tip kum ka ‘Domestic Violence Act’ bad uba ngat ha katei ka kyndon aiñ u hap ban shah set along bun-bun snem.
Nalor kata, ka la batai ha kaba ïadei bad kiba donkti ha ka ban thombor ïa ki kynthei khynnah da kaba ktah kti bad thmu batbor, kren tohmet, byrngem-byrsit bad kiwei kiwei, ki la shah pynap lypa ha ka POCSO Act nalor kiwei-kiwei.
Ka Kong Ksoo ka la kyntu ïa ki kynthei bad longkmie ban mih shakhmat ban ujor lada jia kano-kano ka jingshah thombor bad shah ban beiñ.
Katba ka Dr J.N. Shullai, Director MCSWA haba batai shaphang ka ‘Drug Abuse’, ka la ong ba ka West Jaiñtia Hills District ka dei kawei napdeng ki 206 tylli ki District hapoh Ri India kaba jur bha ki briew kiba ngop ha ka jingpyndonkam ïa u drok.
